Aizawl: Champhai Police Special Task Force chuan Thawhlehni zan khan Silchar, Assam atanga kal Balero Maxx atangin Manta Ray/Mobula samkhuih (gill plates) rep nia hriat Kg 210 vel chu an man.
Police hian Champhai pan mek, Bolero Maxx (AS-01-TC-8784) pakhat chu rinhlelh thilah an tiding a. Motor hi Rajiv Hussein Laskar (26) khalh niin ani bakah hian Jinuk Uddin Laskar (30) a tel bawk a, Lirthei hi dap a nih hnuah sangha rep nia hriat, ip pakuaa khung hi an hmu a ni.
An thil mante hi international black-market-ah chuan Rs. vaibelchhe 2.30 vela hlu tura chhut a ni a, Mizoram chhunga hetiang thil man tam ber tum nia ngaih a ni.
Heng an thil mante hi Wildlife Laws hnuaia humhalh a nih avangin thil man, lirthei leh a phurtu mi pahnihte chu Divisional Forest Officer, Champhai Forest Division hnenah dan anga hma lak zui turin hlan an ni.