Disaster Management & Rehabilitation (DM&R( Minister Prof. Lalnilawma chuan tun lai khaw cheng avangin Mizoram hmun hrang hrang 29 velah chhiatna thleng a awm thu a sawi a. “Sorkar chu harsatna hrang hrang awm theite sukiang turin a inpeih,” a ti bawk.
Minister hian Ningani tlai khan Aizawl chhim lam kawtchhuah, Ngaizel petrol pump bula leiminna hmun a en a. Report dawn danin zan hmasa thleng khan khaw cheng avanga chhiatna thleng hi hmun hrang hrang, 29 velah a awm thu a sawi a. Sawrkar chuan chhiatrupna thleng avanga harsatna hrang hrang awm thei te sukiang turin a inpeih reng thu sawiin, mipuite chu chiai lo tur leh fimkhur turin a chah a, sorkar hotute lakah rinna nghat ngam turin a chah bawk.
Minister chuan district tinah chhiatrupna thleng thei lakah inven dan leh hmalak dan tur ngaihtuah mek zel a nih thu a sawi a, State Disaster Management Authority leh District Disaster Management Authority-te pawh theihtawp an chhuah zel thu sawiin hmun hrang hranga BDO-te leh zonal officer-te pawh a rang thei ang bera che chhuak thei tura hrilhhriat an nih thu a sawi bawk.
Chhiatrupna avanga sorkar atanga tanpuina dawn theih awm angte pawh felfai tak leh dan behchhana pek an inhuam reng thu a sawi.
Prof. Lalnilawma chuan mipuite chu chhiatrupna thleng thei hrang hrang lakah inring renga awm turin a duh thu a sawi a. Chhiatrupna a lo thlenin mipuite chu chiai mai lova sorkar hrilh vat tura chahin, State Emergency Operation Center leh District Emergency Operation Center-te chu eng hunah pawh biakpawh reng theih an nih thu a sawi a, a tul a nih chuan mi mal phone call pawhin inhrilh mai chu a tha a tih thu leh a inhuam reng thu a sawi bawk.
Lei minna hmunah hian minister hi disaster management-a sorkar hotuten an tawiawm a ni.