Assam Chief Minister Himanta Biswa Sarma chuan kum hnih liam ta chhungin dan lova an state-a Bangladeshi awm 1,679 thawn haw an ni tih assembly thutkhawmah a sawi.
Thawhtannia session-ah All India United Democratic Front (AIUDF) MLA Badruddin Ajmal-a zawhna chhangin Sarma chuan, “Kum hnih kal ta chhung khan dan lova Assam lo lut mi 1,679-te Bangladesh-ah thawn haw an ni,” a ti.
Chief minister hian thawn hawte hi July 1, 2024 leh kumin June 30 inkar a nih thu a sawi a. A hmain dan lova thenawm ram atanga lutte chu Immigrants (Expulsion from Assam) Act (IEAA), 1950 tlawhchhanin ‘hnawh let’ an ni tih a sawi bawk.
Assam chuan sorkar laipuiin ram chhunga dan lova lutte laka thil kalpui dan tur a zawm a zawm tih chief minister hian a sawi a. Dan lova lutte hi an mihring dikna chanvo humhalhsak an ni a, court-ah thubuai an thehluha thutlukna la siam lote chu thawn kir an ni lo tih a sawi.
Congress MLA Nurul Islam-a zawhna chhangin electoral roll-ah D-Voters an tih, khua leh tui an nihna rinhlelhawm chunga vote nei si mi 91,385 an awm tih Sarma chuan a sawi.
Hetiang vote hi Sonitpur district (13,719)-ah an tam ber a, Barpeta (8,081)-in a dawt a ni.
Chief minister hian D-Voter-te hi voter pangngai an ni thei em tih leh paih chi an ni em tih chu an state-ah kum 1997 atang khan Election Commission thupek angin finfiah hna thawh mek zel a ni tih a sawi.
Sarma hian an state-a D-Voter 56,728 chu foreigners tribunal (FT)-in ram dang mi tiin thutlukna a siam tawh a, mi 831 chuan hetianga tih hi dan lo tiin court sang zawkah an khing let mek tih a sawi.
FT hian tun thlengin D-Voter 65,171 chu Indian an ni tih a puang a, mi 42 chu Gauhati High Court leh Supreme Court-in a puang bawk tih a sawi.
Zawh belhna a chhannaah chief minister hian kum 1997 atang khan D-Voter 1,99,596 hai chhuah tawh niin hemi atang hian ram dang mi tih finfiah mi 31,389 chu ram chhung atanga chhuahtir an ni tih a sawi.