Democratic Republic of the Congo (DRC)-a Ebola vei enkawlna damdawi ina thawkte thla tam tak chhung hlawh pek an nih loh avangin nawrh an huaihawt a, damdawi in hna an thawk thei lo.
Hri leng hmunpui ber, Ituri province-a Rwampara General Hospital-a thawktu tam tak hian Thawhtanni khan hna an thawk lo va. Thuneituten DRC hmar lama province pahnih dangah hri hi a darh tawh tih an sawi lai mekin nawrh hi huaihawt a ni.
Nuar zingah epidemiologist, case investigator, lirthei khalhtu leh thlan laihtute an tel.
“Thla hnih chhung zet hlawh pek loh hi engtin nge a awm theih tih kan hre lo,” tiin centre-a thawk, Bahati Claude chuan The Associated Press a hrilh.
DRC hmar lama hri leng hi Africa chanchina a na ber a ni a, sum leh pai lama chhiatna nasa tak a thlen tawh a, mi maktaduai khat vel chu retheihnaah a hruai lut tawh niin UN chuan a tar lang.
Hri darh zel tur ven tumna chu hel awm avangin a hautak sa hle a, heng mite hian helai hmuna ram leilung hausakna awmte thunun an tum a ni.
Hri leng beih letnaah hian thu dik lo thehdarh te, invui dan kalhmang leh damdawi ina thawkte rintawk lohna awm nen thil a buaithlak hle bawk.
Dawithiamin a tihchhuah nia ringtuten thawktute hi an tibuai nasa a, mitthi chhungten invenna nena invui chu duh lovin an hnam tihdana tih an duh bawk.
DRC-a National Public Health Institute chuan Pathianni khan hri hi hmarchhak province pahnih, Haut-Uele leh Tshopo-ah a darh tawh tih an nemnghet.
World Health Organization (WHO) chuan hri darh thi tunun turin tual chhung, ram pum leh khawvel huapa tanghoten tan an lak zual a ngai tih an sawi.
DRC Health Minister Roger Kamba chuan kar hmasa khan sorkarin hlawha buaina chin fela hnathawkte hlawh pek an nih theih nan hma a la mek tih a sawi.
“Pawisa pekte hi a dawng tur dik takte hnena a thlen theih nan kan enfiah a ngai a ni,” a ti a. “Harsatna tlemte kan tawk a, a bik takin list-a inthlak a, hei vang hian hnathawkten hlawh pek an ni lo tih sawiin complaint an siam a, a chin fel dan tur kan nei,” a ti.
Chhinchhiahna thar berah DRC-ah hian Ebola kai mi 1,926 an tling tawh a, mi 702-in an thihpui tawh a. Haut-Uele leh Tshopo nen province pangaah vei an awm tawh a ni.
International Rescue Committee (IRC) chuan hmun thara a darh zel avangin an thenawm, South Sudan-ah pawh a darh theihna a sang zel niin a sawi.