AH & Veterinary Department leh ICAR-NMRI, Hyderabad tangkawp chuan Thawhlehni khan ‘One day training on Hygenic meat production, meat safety & value addition technologies for Development of North-Eastern India’ an buatsaih.
State Veterinary Polyclinic Hospital Conference Hall, Khatla-ah training hi Dr Lalfamkima, Deputy Director (F&FD)-in kaihruaiin resource person Dr Suresh K Devatkal, Principal Scientist, ICAR-NRMI, Hyderabad; Dr. Michael V. Lalrinzuala, V.O (VPH) leh Dr. Vandita Mishra, Assistant Professor, LPT, C.A.U, C.V.Sc. & A.H, Selesih ten zirtirna an pe.
Training-ah hian India hmarchhaka ran talhtute leh a zuartute hnenah sa thianghlim taka sawngbawl dan leh dah that dan chi hrang hrang te, India hmarchhakten meat processing an hlawkpui ve theih dan tur leh thianghlim taka ran talh dan te, sa atanga ei tur tuihnai siam dan te leh sa vawn that rei dan te zirtir a ni.
Sa thianghlim chauh ei thei nan ran talhtute leh zuartute pawh an inenkawl faia sa atanga natna kaichhawngtu tur an ni lo va, ran vulhtuten ran hrisel tha chauh an hralh thin tur a ni tih tar lan a ni.
Ran talh danah te, sa sawngbawl danah te, a talhna hmun leh hmanrua hmante tun aia a thianghlim theih nan hmasawnna tur tam tak neih dan te inzirtir a ni a, sawi ho a ni bawk.
Training-ah hian Rural Animal Slaughter House, Mualpui leh Brigade-a ran talh thinte leh Bazara sazuar tute mi 20 an tel a ni.
Training kharna hun hi Dr. Lalrotluanga Sailo, Director, Animal Husbandry & Veterinary Department-in a hmanpui a, a kalte hnenah certificate leh ran talhna atana hman tur hmarua sem a ni bawk.