Aizawl: Development of North Eastern Region (DoNER) ministry hnuaia awm, North Eastern Council (NEC) chuan May-June, 2026 chhungin Mizoram tana hmasawnna ruhrel siamna atan Rs, vaibelchhe 20.17 a pe.
Mizoram hnena sum pek zinga Rs. vaibelchhe 13.68 hi Schemes of NEC (SoNEC) atanga pek niin Rs. vaibelchhe 6.50 chu North East Special Infrastructure Development Scheme (NESIDS–Roads) atangin a nih thu Ningania Mizoram sorkar thuchhuahin a tar lang.
SoNEC hian hriselna, lo neihna, culture, scientific research, khuarel humhalhna leh khawtlang hmasawnna atan sum hi a pe thin a ni.
Mizoram atanga damlohna avanga Shillong pan thinte tan NEC hian Patient Lodging & Staff Quarters chu North Eastern Indira Gandhi Regional Institute of Health and Medical Sciences (NEIGRIHMS) bula sak nan a pe a, Central Medical Warehouse, Aizawl sak nan a pe bawk.
Lo neih leh allied sectors lam atan NEC hian Kolasib leh Mamit-ah kuhva huan neite tan tanpuina a pe a. Fish Farmer Training Centre, Lengpui hmasawnna atana sum a pe bawk.
Mizoramin a culture a vawn nun leh tihhmasawn nan NEC hian Bethel Veng, Champhaia auditorium sakna tur a pe a, Aizawl Institude of Arts & Music te puihna atan Kawlri-ah Cultural Heritage Centre tihhmasawnna tur a tumsak.
NEC hian Champhai district-ah ram chereu zel tur venna atana hmalakna neiin hmeichhiate hriselna leh nu nau pawmte enkawl that pawimawhna inzirtirna leh hriselna kawnga hmasawnna tura hmalakna atan tanpuina a pe bawk.
NESIDS (Roads) hnuaiah Kolasib, Mamit, Lunglei leh Lawngtlai-a oil palm link road km 32.70-a thui thuam thatna tur pek a ni a, heng kawng hi khaw 19-a mipui 60,000-ten an hmang tangkai tur a ngaih a ni.
Kawng hi thlai thar phurh chhuah nan te, hriselna, zirna leh thlai hralhna kawngahte hmasawnna a pek piah lamah oil palm chin kawngah thanna a thlen tura ngaih a ni.
May-June, 2026 khan NEC hian agency hrang hrang – university, technical institute, NGO, society leh a dangte hnenah hmarchhak hmasawnna tur hian Rs. vaibelchhe 18.93 a pe chhuak bawk a. Mizorama Sikpui Ruoi Festival 2025 hmanna te, Mizoram Challenge 2025 hmanna te leh Foundation for Drug-Free Mizoram-in anti-drugs campaign an kalpuina te pawh heng fund-ah hian a tel.