Aizawl: Mizoram Pradesh Congress Committee chuan Thawhlehni chhun dar 12 hian Mizoram hmun hrang hrangah Foreign Contribution Regulation (Amendment) Bill (FCRA) leh India-a Kristiante tihduhdahna hluar zel duh lohna lantir nan ‘Black Day’ hman an tum.
Ningania Aizawl Press Club-a thuthar lakhawmtute an kawmnaah Congress chuan ‘Black Day’ hmang tur hian kohhran hrang hrangte pawh sawmna an pek tawh thu an sawi a, he hun hmanpui tur leh thlawpa telpui theuh turin Zoram mipuite ngenin an sawm.
FCRA chu Kristiante tana tha lo leh him lo a nih avangin MPCC chuan BJP kaihhruai sorkarin Kristiante nekchepna hmanrua atana a chhawpchhuah chu a tawp thleng dodal an tum thu an sawi.
MPCC chuan BJP kaihhruai sorkarin Kristiante nekchepna hmanrua atana FCRA Bill 2026 a chhawp chhuak chu tha lo an ti a. NGO leh Kristian pawl hrang hrangten ram pawna Kristiante hnen atanga tanpuina pawisa an dawnah harsatna a siam phah niin an sawi.
BJP sorkar hnu hian FCRA hnuaia license nei pawl 20,000 chuang tihtawpsak an ni a, heng zingah hian Mizorama pawlte pawh an tel thu an sawi a, “Tunah hian kohhran pakhat pawisa dawn tur pawh hrensak mek a ni,” an ti.
“March 31, 1976 atanga khan FCRA hi hman tan a ni a, 1984 khan amendment siam a ni a, foreign fund-te uluk zawka kalpui duhna avangin kum 2010 khan siam that a ni a, kum 2020 khan BJP sorkar chuan amendment siamin NGO leh kohhrante foreign funding chu khirh takin a kalpui a, Kristiante chu foreign fund dawng hnem ber an nih avangin he dan hman tum hian Kristiante a bitum riauin a ngaih theih a ni,” an ti.