President Donald Trump-a’n Tehran chu ‘nungchang tha zawk’ nei tura a vau hnuah US chuan Iran – lakah beihpui a thlak thar zui.
US sipaite chuan ‘sipai chakna hmanga Strait of Hormuz kaltlangte tihthaih thin’ Iranian sipaite beih a nih thu an sawi a. Sorkar chanchinbu chuan an khawpui, Tehran-ah pawh air defense a ri nasa hle niin an tar lang.
Iran pawhin Bahrain leh Kuwait telin an chhehvela US sipaite an bei ve bawk tih an sawi a, ni nga chhung indona thar a chhuah leh tak avangin a tihtawp tura an inremna hmasa chu a tikhawtlai mek.
Iranian palai hotu, Mohammad Bagher Ghalibaf-a chuan sorkar chanchinbute a kawmnaah Tehran chuan inremna hi a hlawkpui lo a nih chuan zawm chhan tur a nei lo tih a sawi.
Trump-a chuan Thawhlehni tlai khan karleha inbe tura Iran a kir leh lo a nih chuan lei leh power plant-te beih a tum tih a lo sawi tawh.
US-in a beih thar lehah hian Nilainia a kah chu khaw ên laia a tih a ni a. A hma lawkin ‘Iran-in Strait of Hormuz-a sumdawng lawng a beih theihna tihchhiat a ni’ tih a sawi a, Iran-a lawng chawlh hmun an khar bawhchhiat tum lawngte an kap bawk tih an sawi.
Minute 90 chhung an kahah hian Iran tuipui kama an hmunpui leh cruise missile an dahna leh Greater Tunb Island-a mi an beihna hmunte an kap tih US Central Command (Centcom) chuan a sawi.
US-a Nilaini zan dar 09:00 (India-a Ningani zing dar 06:30)-ah an tawpsan tih Centcom chuan a sawi.
Thuchhuah an siamah US hian Strait of Hormuz kama Bandar Abbas telin Iranian ‘command center, air defense hmun, missile leh drone kah chhuahna leh tuipui kama mi an thlithlaina’ hmunte an kap tih an tar lang.
Tehran-a air defence ri hriat tur a awm bakah sorkar chanchinbu chuan Gulf luh tanna, Ahvaz-ah chuan damdawi in bul lawkah missile kah ri a awm avangin a awmte thiar chhuah an ni tih a tar lang.
US beihna chhan let nan Iran hian drone hmangin Jordan-a US army communication system leh hmanrua an dah khawmna an kap tih sorkar chanchinbu chuan a tar lang a. Jordanian sorkar chanchinbu pawhin an sipaiten drone pariat an kap thla a, thil chhia leh thi leh hliam an awm lo tih an sawi.
Centcom chuan Thawhlehni tlai atanga Iranian lawng chawlhna leh tuipui kama lut leh chhuak tur dan nana lawng chawlhna an dan hnuah sumdawng lawng pahnih chu an dang tawh tih an sawi bawk.
April thla khan US hian Iranian lawng chawlhna hi a lo dang tawh a, June thlaa inremna an siamah hawnsak leh mah se Thawhlehni atang khan a khar leh ta a ni.