Congress chuan Thawhtanni atanga tan tur parliament fur thutkhawmah Ram temple-a thawhlawm ruk bo nia sawi te, exam zawhna put te, education system te, thil man sang leh foreign policy chungchangah Narendra Modi-a sorkar nasa taka beih an tum thu an sawi.
Party chuan Lok Sabha leh assembly bial ramri siam that leh minister leh chief minister-te paih theihna tur danpui siam thatna tur bill put luh turte chu na takin an dodal dawn tih an puang a, session chhunga dan siam tura put luh tur dang eng emaw zat pawh an dodal dawn tih an puang bawk.
Congress Parliamentary Party (CPP) hi Ningani khan an chairperson, Sonia Gandhi-i chenna in, 10 Janpath-a thukhawmin session neih tur hi an sawi ho va. Thutkhawmah hian Congress President Mallikarjun Kharge, Lok Sabha-a Leader of Opposition Rahul Gandhi, AICC General Secretary K C Venugopal, Rajya Sabha Chief Whip Jairam Ramesh, P Chidambaram, K Suresh, Naseer Hussain, Manickam Tagore, Kumari Selja, Tariq Anwar, Shashi Tharoor, Manish Tewari leh hruaitu lawk dangte an tel.
An thutkhawm zawhah Kharge-a chuan session chhunga an party-in thil an sawi chhuah tumte X-ah a tar lang.
“Zawhna put ru leh education system ei ral na te, political party tihchhiat, scam tam tak leh eiruk thubuai siamsak, thil man sang uchuak, foreign policy hlawhchhamna, lirthei neitu nuai 3.5-te laka ethanol blending dah, ruahmanna mumal awm lova ram ngaw thiah leh SC, ST, OBC leh tlem zawkte dikna chanvo hi Congress Party-in Parliament Monsoon Session lo awm turah Modi-a sorkar chhan turin kan sawi chhuak dawn a ni,” a ti.
Thutkhawm zawha thuthar lakhawmtute a kawmnaah Congress General Secretary in-charge Communications Ramesh-a chuan an party chuan sorkar hian kumin kum tir lama an tlangpui zawh loh, bial ramri tihthatna tur bill put luh leh an tum tih an hria tih a sawi.
Ramesh-a chuan Constitution amendment bill dang, ni 30 chhung dan bawhchhiat avanga lung ina tang minister-te paihna tur pawh put luh tum a ni tih a sawi a. “Congress Party chuan Delimitation Bill leh minister-te paih theihna tur Constitution Amendment Bill hi kan do tlat dawn a ni,” a ti.
Session inbuatsaih nan hian eptu tangrual, INDIA chu Thawhtanni hian an thukhawm dawn bawk a, sorkar laipuiin Pathianni hian all-party meeting a ko bawk.
Sorkar chuan fur thutkhawmah hian bill pawimawh tak tak pharh a tum a. Heng zingah hian bial ramri siam thata Lok Sabha-a member tam zawk awm theihna tur te, dan bawhchhia prime minister, chief ministers leh union minister-te ni 30 lung in an tana chawlhtir theihna tur te pawh a tel.
Sorkarin dan siam a tumte bakah eptute hian NEET zawhna put te, Ayodhya-a Ram temple thawh lawm bo te, tuialhthei man sang leh India-US trade deal chungchang sawi chhuah an tum viau bawk.
Parliament fur thutkhawm hi Thawhtanniah tanin August 13 thleng a awh dawn a ni.