Aizawl: Commerce, Industries, Geology & Mining Minister F. Rodingliana chuan Thawhlehni khan a pisa-ah Bamboo Handicraft Cluster hnenah mau leh thing sawngbawlna tur khawl chi hrang hrang a sem.
National Bamboo Mission leh MSE-CDP Scheme atanga Bamboo Development Agency (BDA) kaltlanga hmuh khawl 80 hi sem a ni a, a hlut zawng hi Rs. 2,67,44,174 a ni. Khawl hi Edenthar leh Sesawng Bamboo Handicraft Cluster, Tuma Ecoguard Solution leh Wood Carpentry Cluster, Baktawng te hnenah semchhuah a ni.
Minister F. Rodingliana chuan Mizorama leilung hausakna mau leh hruihnang te tangkai taka hman zel a tul thu sawiin, thalaite tana chawikanna atan leh hna tam zawk siam leh hmasawnna atan cluster leh industry din a pawimawh thu a sawi a. A bik takin paper mill din leh bamboo pulp hman tangkai kawnga ngaihtuahna seng turin khawl dawngtute a chah bawk.
BDA hi kum 2002-a din a ni a, Sairang-a Bamboo Technology Park changtlun te, National Bamboo Mission (NBM) atangin Zuangtui EIBTC-a Incubation Centre siam leh Central Jail-a tangte tana vocational training pein, raw batti/thosi hlo siam zir tirin tual chhungah hralh chhuah mek a ni.