Aizawl: Mizo Zirlai Pawl (MZP) chuan NEET question put ru avanga harsatna tawk an awm tawh loh nan peaceful protest an buatsaih dawn.
Thawhlehnia MZP Conference Hall-a MZP Executive meeting chuan, India ram pum huapa NEET-UG exam question paper a leak out avanga zirlai tam takin harsatna an tawk leh mi tam takin nunna an chan chu pawi an ti thu an sawi a. He thil avang hian Mizo zirlai 1,000 chuang fe pawhin harsatna an tawk ve thu an sawi.
MZP chuan question leak demna leh hun lo kal zela zirna leh exam kalphung thianghlim zawk a awm theih nan, Ningani chawhma dar 11 hian Vana Pa Hall kawtah peaceful protest an buatsaih dawn a ni. MZP chuan Mizo mipui leh zirna ngai pawimawhtute he hmalaknaa tel tur hian an sawm a, an headquarters leh sub-headquarters-te pawh mahni huam chhung theuhva remchang anga hma lo la turin an hriattir nghal bawk.
MZP hotute hian Election Commission of India (ECI)-in Mizoram-a Special Intensive Revision (SIR) a kalpui mek chungchang pawh ngun takin an ngaihtuah a. Voters pun tam zualna khaw hrang hrang a hearing an neih hunah a theih ang anga kalchih a, vil nise an ti a. Hei bakah hian SIR chungchanga harsatna leh thil pawimawh dangte chu ECI leh Mizoram Election thuneitute a rang thei ang bera sawipui chhunzawm nise an ti bawk.