Aizawl: Mizoram Pradesh Congress Committee (MPCC) chuan Central-a BJP sorkarin Foreign Contribution (Regulation) Amendment Bill 2026 pass a tum dodalna leh duh lohna lantirnan Thawhlehni khan Vana Pa Hall kawtah ‘Black Day’ an hmang.
He hunah hian MPCC Sr. Vice President Lalnunmawia Chuaungo chuan thu sawiin, FCRA dan thar hnuaiah hian foreign contribution certificate hnawl palh a nih pawhin appeal-na tur a awm tawh dawn loh thu leh, Central-in a duh chuan he dan hmanga asset (building leh khawl) siam tawhte kha an chhuhsak tawp thei dawn a. Hei hian Mizoram-a kohhrante hmalakna — Durtlang Synod Hospital, hnuchham leh rualbanlote enkawlna leh ruihhlo ngai enkawlna hmunte thlengin harsatna nasa tak a thlen dawn tih a sawi.
Lalnunmawia Chuaungo chuan Chief Minister Lalduhoma chu Kohhran, NGO leh Party hruaitute ho a Prime Minister hmuhpui tur leh, Mizoram Legislative Assembly-ah Special Assembly ko a FCRA dodalna official resolution pass tura an ngen thu a sawi a. Hei bakah hian Mizoram MP-te pawh Parliament-a bill sawi ho a nih hunah a ep zawnga thu sawi leh vote thlak turin a chah bawk.
AICC i/c Mizoram Dr. Chella Kumar pawhin thu sawiin, BJP sorkar thil tum ber chu NGO, minority leh sakhaw tenau zawkte an ni tih a sawi a. “FCRA hi an tikhirh em em a, he dan hnuaiah hian FCRA hmanga din biak in te, damdawi in leh school te thlengin chhuhsak theih an ni dawn a, hei hian kohhran te, NGO te a nghawng dawn avangin kan duh lovin kan dodal a ni. Hetih lai hian BJP te innghahna RSS te chu he FCRA hian a nghawng ve thei dawn lo bawk,” a ti.
He hunah hian ADCC President Lalroenga resolution putluh lungrual taka pass a ni.
Lunglei Venglaiah pawh Congress Party buatsahin Thawhlehni khan FCRA bill parliament a putluh tur dodalna lantir nan Black Day hman a ni.
- Resolution pass-te
- FCRA Amendment Bill, 2026 hi BJP kaihruai sorkar laipui in hnuk kir rawh se.
- India rama Kristian-te chunga hleilenna thleng thin titawp turin BJP kaihhruai sorkar laipui in hma la rawh se.
- India rama Kristian-te thlavang hauh turin Mizoram chief minister hi pen chhuak ve tawh rawh se.
- FCRA Amendment Bill, 2026 hi Kristian-te tan a that loh em avangin hnuk let tura nasa taka nawr turin Mizoram chief minister hian Kohhran hruaitute, NGO hruaitute leh political party tin hruaitute sawm khawmin prime minister hmuhpui rawh se.
- FCRA Amendment Bill, 2026 hi Parliament-a put luh a nih hunah Mizoram MP ten dodalna thu sawiin, vote thlak hunah pawh ‘hai’ mai lovin, a dodal zawng ngeiin vote thlak rawh se.
- Mizoram Legislative Assembly-a FCRA Amendment Bill, 2026 dodalna resolution pass a nih theih nan Mizoram sorkarin Special Assembly ko rawh se.