Kan ramah lungmuala kan awm laiin kan thenawm ram, min deptu tam tak an buai a, heng mite hian sahimna zawngin vawiin thlengin min bel a, hmun thenkhatah chuan buaina hial siam chingte pawh an awm a ni awm e.
Kan boruak kalchho mek avangte pawh hi a ni mai thei, tam tak chuan tunlai hian 8th schedule-a mizo tawng dah chungchang an ngaihven thar a, sorkar thlengin dah luh tumin hma an la chho ta.
MZU lama hun a hmannaah nilaini khan chief minister chuan 8th schedule-a mizo tawng dah anih theih nan hmalak mek a nih thu sawiin, tribal quota erawh a bo dawn lo niin a sawi a, hei hi ngaihven ngai a ni.
Tribal quota kan nei bik hi kan vanneihna, kan hnam tana tha em em a ni a, hei hi a bo a nih vaih chuan kan hnam chu dinhmun derthawng takah kan ding thei a ni tih hriain, kan hnam himna tur hi ngaihtuah hram hram zel ni rawh se.
Mizote leh kan hnam tawng ngei pawhin hma a sawn chho zel nia sawi a ni a, hei hi khawvel hmasawnna sang zelah pawh kan tana tha leh kan thanchhoh zelna tura pawimawh a ni. Chumi vawnhim kawngah chuan tuna mite hian theihtawp i chhuah zel ang u.
8th schedule a ni emaw, tribal quota a ni emaw, kan hnam himna tur zel hi ngaihtuah hmasak ni sela, sorkar pawhin anmahni thua kalpui mai loin mithiam leh helama hmalatute rawn kawngah hian ngaihtuahna seng zui zel bawk teh se.