Aizawl: Aizawl District Disaster Management Authority chuan Kulikawn (Ngaizel) pheia lung tla leh leimin hlauhawm tak awm mek chu a hnuai kawng hmangtute him zawk nan mi thiamte ruahman angin draping (tuam) hna thawh a nih tur thu thuchhuah a siam.
Disaster Management Act, 2005 section 30 leh section 34 hnuaia thuneihna pek a nih angin, DM&R Chairman chuan thupek chhuahin, draping hna thawh chhung July ni 27 atanga August ni 1, zing dar 10 atanga tlai dar 4 chhung hian lirthei eng chi mah tlan a phal dawn lo va; Nghakliana Filling Station pawh hnathawh hun chhung hi chuan khar tura tih a ni.
Hemi chungchangah hian Traffic SP-in duty-te dahin a tul angin lirthei tlan dan ruahmanna a siam ang a, draping hna thawh zawh a nih hnuah PWD, Road South Division-ten kawnga lung leh lei tlate thenfai hna an thawk zui nghal ang.