Home Minister K. Sapdanga’n Inrinni zan khan LPS Arena, Falkland-a Joint Hnampual Meet 2026 hun thumna neih chu khuallian niin a hmanpui a, Mizoram sorkar chuan ram rorelna kal sual siam that, corruption do, leh remna leh lungrualna thlentir zel a tum thu a sawi.
Joint Hnampual Vice Chairman Lalramliana Ralsun chuan inkhawm kaihruaiin Mizoram UPC Superintendent Rev. Dr. Ngurthanpara Sailo chuan hunserh a hmang.
Khuallian chuan thu sawiin, Mizoram hmingthanna leh zahawmna ber chu tawng leh mize hrang hrang hmangte inrem taka an khawsaho thei hi a ni tiin, tun hma deuh khan thalaite zingah mahni tawng thluk ang hmang lo bula mite en hran mai ching an awm thin a, chu ang mite chu mi hnuaihnung tak, ngaihdam mawlh mawlh ngai an ni a, tunah hi chuan chu anga tawng thlahdah chu an awm ngai tawh lem lova a hriat thu sawiin, “Huan pakhat chhungah rose par rau rau pawh a sen hlira par ai chuan a sena par te, a vara par te a inpawlh chuan a mawi zawk daih ang hian, hnahthlak thuhmun zingah pawh tawng thluk hrang hret te, hnam lam hrang hret te, mize hrang hrangte lungrual taka kan han khawsaho hi a mawi a, a hlu a, a zahawm em em a ni,” a ti.
K Sapdanga chuan Zo hnahthlak hnam hrang hrang inlungrual taka ke an pen chu lawmawm a tih thu sawiin, Mizo zirlaite chu ram siam thatna tur hmanrua an nih avangin zirna thlahdah lo tur leh, ram leh hnam tana rinawm turin a fuih a. “Kan tawng ki leh ziate hrang thin mah se, thisena inzawm unau kan nihna vawng nunga zaikhata luang zui zel turin i inbuatsaih ang u,” a ti a. Zirlaite chu nakkin maia ram rorelna leh kalsiamna hnarkaitu tur an nih avangin zirna lama inbuatsaihna tha neih that a pawimawh thu sawiin, ram hruaitu tha tak takte pawh zirlai nih laia zirna ngaihsak thiamte ngei an nih thin thu a sawi.
Mizoram sorkar chuan ram rorelna kal sual siam that, corruption do, leh remna leh lungrualna thlen tir zel a tum thu sawiin, he ram hi ram nuam leh hmasawn tak a nih zel nan Hnampual Zirlai Pawlte pawh sorkar nen lungrual taka thawhho chhunzawm zel a beisei thu sawiin, “Kan lungrual a, kan inngeih tlan phawt chuan, chu chuan hmasawnna a hring ang a, he ram hi ram nuam leh ram hmasawn takah kan chantir thei ang,” a ti.
Khualzahawm Robert Romawia Royte, Hachhek bialtu MLA pawhin thalaite chu tum sang leh ngaihtuahna changkang zawk nei tura inbuatsaih tur leh thawhrimna ngaihsan changkan zawk tun din a tul thu a sawi bawk.