Aizawl: Social Welfare Department leh Mizoram Presbyterian Kohhran (Synod) te tangkawpin Pathianni chawlhni atang khan Chanmari Kohhran Hall-ah Narcotics Awareness Campaign bul an tan.
He hun hi Social Welfare Minister Lalrinpuii chuan hmanpuiin, Mizoram sorkarin Hulhliap a buatsaih hlawhtlin mai bakah, kawng hrang hranga ruihhlo avanga harsatna tuarte puih dan tur sorkarin a ngaihtuah reng thu a sawi a. Hautak lutuk silo system tangkai si neih a tul a, chumi atan chuan Narcotics Anonymous kalpui a tul thu a sawi a. After Care Skill Training lamah pawh Mizoramin Synod te leh BCM, ECM, LIKBK te leh NGO te thawhpui dan tur a duang mek tih a sawi bawk.
Minister chuan ruihhlo avanga harsatna tuarte mamawhtute an rawn kalpui thin nan Kohhran, tlawmngai pawl leh chhungkuate a ngen nghal a ni.
He Awareness Campaign hi Aizawl leh a chhehvel kohhran 27-ah neih chhoh tura ruahman a ni a. Social Welfare Department hnuaia MSD&RB leh Mizoram Drugs User Forum (MDUF) atangin Resource Person leh Counsellor-ten hun an hmang thin dawn a ni a. Ruihhlo ngai te bakah an chhungte tana Family Sensitisation hun buatsaih tel a ni bawk ang.
Inkhawm hi Upa Peter Zohmingthanga’n kaihruaiin, Bialtu Pastor Rev. Dr. H. Vanlalruata’n hunserh a hmang a; Muses Zofaka Pachuau (Adviser, MDUF) leh Lalfakawmi (Executive Officer, MSD&RB) ten awareness campaign hun hi an hmang zui a ni.