Aizawl: Aizawl District Water & Sanitation Mission (DWSM) buatsaihin, Thawhtanni zing khan Aizawl DC Office kawtah State Water & Sanitation Mission (SWSM) atanga Aizawl district tana tawihtheilo khawn khawmna motor (dry waste collection vehicle) pali leh vantlang bawlhhlawh bawm 421 sem chhuahna hun neih a ni.
Aizawl DC leh DWSM Chairman Er. Lalhriatpuia chuan tawihtheilo khawnna lirthei palite hi a hmangtu tur te hnenah hlan chhawngin a vailiam nghal a ni.
Heng lirtheite hi Swachh Bharat Mission Grameen (SBM-G) atanga motor pasarih lei zinga mi niin, Aizawl district-in pali a chang a. Seling Plastic Waste Management Unit (PWMU) enkawltu Vanzel EcoSolution hnenah pahnih leh, Aibawk PWMU enkawltu Waste Tech & Bio-Energy hnenah pahnih hlan an ni.
PHE department enkawl SBM-G hnuaiah hian Mizoram pumah hmun ngaah tawihtheilo bawlhhlawh sawngbawlna mumal takin kalpui mek a ni a. Aizawl district-ah hian Thingsulthliah leh Darlawn RD Block huamtu Seling PWMU leh, Aibawk leh Tlangnuam RD Block huamtu Aibawk PWMU te an awm a ni.
Heng sawngbawlna hmun pahnihte hian khua 48 atangin in 12,000 vel an tuam mek a, khaw tam zawk huam tura hmalak chhoh zel a ni.
Heng bawlhhlawh sawngbawlna hmunte hi mipui fee pek hmanga enkawl an nih avangin, fee luh that thin loh avanga harsatna tawk thin te chu lirthei thar sem hian a chhawk zangkhai tura rin a ni. Lirthei bakah hian bawlhhlawh thliar hrang tha leh fee pe tha thlanchhuah khua 23-a dah turin vantlang bawlhhlawh bawm 421 sem tel nghal a ni bawk.