Aizawl: Leader of Opposition (LoP), MNF Vice President Lalchhandama Ralte chuan Foreign Contribution (Regulation) Act (FCRA) chu Mizo Kristiante leh tlawmngai pawlte nghawng chhia a nih avangin MNF-in a do tlat tih sawiin, Mizoram MP-te chu he thil hi doa abstain mai mai lo turin an phut thu a sawi.
MNF Hnam Run-a Thawhtannia political session neihah thusawiin Lalchhandama Ralte chuan FCRA Amendment 2026 hian foreign atanga tanpuina lo lut turte central sorkarin a khuahkhirh vek dawn avangin Mizorama sikul leh fahrah enkawlna ten an tuar dawn tih a sawi a, “Tin, he danah hian an hmunhma (assets) laksakna dan te, SBI Main Branch-ah chauh tanpuina sum a lut thei tawh dawn a, central sorkar chuan engkim an centralized dawn a. FCRA hi MNF chuan do ngei ngei a duh a ni,” a ti.
FCRA chungchangah MNF chuan hma an lo la daih tawh tih sawiin Lalchhandama Ralte chuan, “July 7, 2026 khan Special Intensive Revision (SIR) 2026 Draft Roll chungchang inrawnkhawmnaah MNF chuan FCRA hi agenda-ah kan thawh a, ‘i sawiho ang u, i do ang u,’ kan ti tawh a ni. Ka agenda erawh a kaltlang lo,” tia sawiin, FCRA an duh loh thu vantlang hriatah an puang chhuak tawh a. MNF president Delhi-a cham mek pawhin hotu liante hnenah an duh lohna hi a thlen dawn niin a sawi.
Lalchhandama Ralte chuan Lok Sabha leh Rajya Sabha-a Mizo MP-te chu do a, abstain (vote pe lova awm) mai mai lo turin a phut thu a sawi a. Nagaland leh Meghalaya chief minister-te pawhin Delhi-ah hotute an sawipui tawh avangin Mizoram sorkar pawh hma la ve turin an phut tih a sawi bawk.
Inthlan denchhena sikul upgradation 2023 tih anga sorkar tharin a puh tlat chungchangah Lalchhandama Ralte chuan, he hmalakna hi kum 2021 atang tawha an lo kalpui tawh zawk a nih thu sawiin, sorkarin sikul hlangkai tawh a cancel leh chu a pawi a tih thu a sawi a. Sorkar official-te leh dept. hrang hrang rawtna leh inrawnna ngeia cabinet-in an lo pass tawh thin a nih thu sawiin, MNF an sorkar leh a nih chuan he hmalakna hi an chhunzawm leh tur thu a sawi.