President Emmanuel Macron-a chuan an ram chhimthlang lama ram kang nasa tak thunun a nih theih dan turin French cabinet thutkhawm hmanhmawh a ko va, kang hian khawpui hlun tak, Bordeaux a kan kai loh nan kang thelhtuten hma an la mek bawk.
Khaw chin thlirtute chuan tun kar tawp lamah hian France-a khua a lum thar leh vak dawn tih an la sawi bawk.
Kang thelhtute chuan zanah pawh hna an thawk a, Bordeaux pawh telin uain thar chhuah tamna, Gironde province thuneitute chuan an dinhmun chu a khirh hle tih an sawi.
Bordeaux Mayor Thomas Cazenave chuan Pathianni khan kang hi ‘khawpui luhka a thleng tawh’ tih a sawi.
A hnaihna lai berah chuan mihring 8,50,000 chuang chenna, Bordeaux khawpui atanga km 15 vel chauhva hla a ni tawh.
Video tihchhuahah chuan ram kang hian chhiatna nasa tak a thlen tih a lang a, a khu dum chhah tak chu van lamah a chho nguah nguah a, thing tha tak takte chu a kang chhe duai duai a ni.
“A nasat dan hi a hmaa kan la hmuh ngai loh a ni,” tiin Bordeaux daia Cestas Mayor Jerome Steffe-a chuan a sawi.
France leh Spain-a ram kang mek hian chhiatna nasa tak thlenin mi 3,00,000 chuangin an chenna an chhuahsan phah mek a. Europe-in khaw lum uchuak tak an tawh hnuah a kang a ni.
Europe hian tun nipuiah hian lum uchuak tak vawi thum a tawng tawh a, hei hian ram kang a tizual a. Ram tam takin khaw lum ber record an siam thar.
Spain-ah chuan mi 75,000 chuang insaseng ngaiin an awm tawh a. A kang nasa ber berte chuan Madrid an hnaih hle a; mahse, an ‘kal muang hret tawh’ tih region sorkar chuan Thawhtanni khan a sawi.
Thuneitute chuan Madrid atanga insaseng thenkhat chu an ina haw an phalsak leh tan bawk.