Thisen mamawhna a sang zel a, nitin pek ngai an awm reng bawk. Thisen thianghlim pe tur hian mihrisel leh invawng nih a ngai a, hetiang mi thalai hi mamawh a sang zel bawk.
Hetih lai hian Electric veng, Aizawl tlangval C. Lalremruata chuan kartawp khan a vawi 100 nan thisen a pe a, hei hi chhinchhiah leh hriatreng tlak a ni.
Thisen pe theitu nih hi a hlu a, thisen pe tam nih phei chu hlu tak a ni. Mizo zinga vawi 100 thisen pe thei kan nei hi a lawmawm a, fak tlak a ni bawk.
Remruata hian a theih chuan pek zel a la tum thu sawiin, thisen pe turin midangte a fuih bawk. A thlawna thisen petute hlutzia chu pek ngaia kan awm chiah hian a hriat a, Mizo tlangvalin heti zat thisen a pe thei hi thangtharte tan entawn tling a ni.
Thisen mamawhna hi a sang telh telh dawn a, mizo thalaite hian thisen pe thei turin invawng thianghlim ila, thisen pek uar zelin, midangte entawn leh tihhmuhtu nih i tum zel bawk ang u.