Aizawl: All India Radio (AIR) Aizawl kum 60 tlinna, Diamond Jubilee pualin Larsap General (Dr) Vijay Kumar Singh chuan AIR Aizawla thawktute leh Mizoram mipuite hnenah lawmpuina leh duhsakna thuchah a thawn.
Larsap chuan AIR Aizawl chu a din tirh atangin kum 60 chhung zet mipuite rawng thahnemngai tak leh chhum lo chat lova lo bawltu, thu dik leh rintlak thehdarhtu pawimawh ber a nih reng thu a sawi a. Mizoramin ram buai leh hun khirh tak a hmachhawn lai pawhin mipuite tana thuthar dik leh rintlak hriattir kawngah AIR Aizawl chu a pawimawh hle a, tun thlengin a tangkai dan a la danglam chuang lo tih a sawi.
Thuthar puangtu a nih bakah AIR Aizawl hi Mizo hnam ziarang leh nunphung humhalhtu a nih fawm thu leh, tunlai thiamna hmang tangkaiin chhuan hrang hrangte hnen a thleng thei zel tih a sawi bawk.
Prime Minister Narendra Modi-a’n thla tin ram mipuite hnena thuchah a sawi thin, ‘Mann ki Baat’ program pawh episode tam tak AIR Aizawl hian a lo tihchhuah tak thu sawiin, hmarchhakah tawng hrang hrang hmanga radio program pek chhuah a ni thin chuan khawpui tluk zetin thingtlang kilkhawr bera chengte tan pawh tangkaipui zui zel a nih thu a sawi.
Larsap chuan AIR Aizawla thawktu zawng zawngte inpekna leh rawngbawlna chu duhsakna leh chawimawina sang ber phu a ti a, Diamond Jubilee puala zahna chibai a buk thu a sawi a. Khawvel hmasawn chak tak karah mipuite thuthar hrilh, zirtir kawngah tha taka thawk chhunzawm zelin, tun aia hmasawn leh tha zawk ni tura theihtawp chhuah chhunzawm zel turin duhsakna a hlan nghal a ni.