Sorkar laipui chuan E20 petrol-in lirthei a tihchhiat emaw, a tui a heh phah emaw finfiahna a awm lo tih a sawi.
Parliament-a rorel inkhawm kal mekah Nilaini khan tuialhtheia ethanol pawlhin nghawng tha lo a nei em tih chu kum tam tak enchhinna leh inrawnna kalpui a ni tawh tih sawi a ni.
Lok Sabha-a ziaka zawhna a chhannaah Union Road Transport & Highways Minister Nitin Gadkari-a chuan Ethanol Blended Petrol (EBP) Programme hi science thiamna hmanga zir hnu, enchhinna kalpui, laboratory-a endik, mi thiamten tha an tih leh inrawnna neih a nih hnuah kalpui chauh a ni tih a sawi.
Sorkar chuan Indian Oil Corporation Limited (IOCL), Indian Institute of Petroleum (IIP), Society of Indian Automobile Manufacturers (SIAM) leh Automotive Research Association of India (ARAI) ten a huhovin E20 tuialhtheiin two-wheeler leh four-wheeler-a nghawng a neih dan hi kum tam tak an zir tih a tar lang.
Hetianga sorkarin a puan mek lai hian Delhi Taxi leh Tourist Transport & Tour Operators Association chuan August 4 hian petrol-a ethanol pawlh duh lohna lantir nan ram khawpui berah parliament pana kawng zawh huaihawt an tum.
Sorkar laipui chuan tuialhtheia ethanol pawh hi kum 2013-14-ah 1.53% pawlh atanga bul tanin tipung hret hretin December, 2025-ah 20% pawlh a tum a, hei hi science hmanga zirna, enchhina leh inrawnna huaihawt atanga thutlukna siam a ni tih a sawi.
‘Roadmap for Ethanol Blending in India 2020-25’ tih chu June, 2021 khan tihchhuah niin ethanol pawlh hian engine hnathawh, tuialhthei insem darh dan, khalh dan, lirthei tlona, khu a pek chhuah leh tuialhthei a heh dan zir chian hmasak vek a ni tih sorkar hian a sawi.
Zir chianna atang chuan E20 petrol hian lirthei khawl tlona, a chak zawng, a khalh nawmna leh Bharat Stage VI (BS-VI) khu a pek chhuahah nghawng tha lo engmah a nei lo tih hmuh a ni a. BS-VI lirtheite chuan khu an pek chhuah chu E20 tuialhthei an hmanah a ngai reng niin sorkar hian a sawi.
Sorkar hian tun lai car leh two-wheeler-te chuan E20 petrol hmang turin an khawl tihdanglam an mamawh lo tih a sawi a. Hetih lai hian April 1, 2005-a tihchhuah BS-III lirthei leh kum 2016 hma lama siam lirtheite chuan rubber part leh gasket thlak a ngai thung niin a sawi a. Hetiang thlak hian lirtheiah harsatna engmah a thlen lo niin a sawi bawk.
Lirtheiin a heh nia sawi pawh sorkar chuan chhangin hei hi ethanol pawlh hman vang a ni kher lo niin a sawi a. Khalh dan, engine enkawl dan, a oil thlak, air filter tihfai, a ke tihpuar zawng, a ke inzawn that dan leh air condition hman danin a tui heh leh heh lo chu a hril tel niin a sawi.
Sorkar hian NITI Aayog hnuaia Inter-Ministerial Committee dinin lirthei khaihkhinna, a tui heh zawng leh a theihna an en fiah hnuah ethanol pawlh tam hi an rawt tih a sawi a. IOCL, ARAI leh SIAM zir chianna nen pawh a inmil niin a sawi bawk.
India-ah hian tuialhtheia ethanol pawlh hi a tahtawla tihpun zel a ni tih sorkar chuan a sawi a. Programme hi kum 2001 khan tan niin kum 2006-ah E5 fuel hman tan a ni a, pawlh zat hi zawi zawia tihpun a ni tih a sawi.