Health & Family Welfare Minister Lalrinpuii leh Power & Electricity Minister F. Rodingliana te chuan Ningani khan Khawzawl district chhunga Dulte Sub Centre leh Kawlkulh Primary Health Centre (PHC) te an tlawh a, damdawi in hmunhma leh hma lakna hrang hrangte an endik.
Lalrinpuii chuan Dulte Sub Centre hmunhma leh an hnathawh dante a hmunah enin thawktute a kawm a. Mipuite tana pan a awlsam zawk nan Sub Centre hlui zawk chu sak thata Sub Centre atana hman zui leh ni se, nau neihna tur (delivery point) pawh siam ni se tha a tih thu a sawi. Tuna Sub Centre atana hman mek erawh thawktute quarter-a hman turin ruahman turin a ti a, he hmalakna hi bawhzui nghal turin CMO a chah nghal.
Dulte Sub Centre-a thla tin nau piang pathum vel an awm thin chu lawmawm a tih thu sawiin health minister chuan, “Ram leh hnam kan humhalha, hma kan sawn theih nan pian pun lamah ngaihtuahna kan sen thar a pawimawh hle a ni,” a ti.
Hemi hnu hian Dulte Village Council (VC) House-ah khawtlang hruaitute nen an inkawm a ni.
Dulte an tlawh hnu hian Kawlkulh PHC tlawh lehin, sak mek a nih dan chu Power Minister F. Rodingliana nen an endik a. Minister-te hian engineering department leh contractor-te chu PHC thar tur chu tha tak leh uluk taka sa turin an chah bawk.