Aizawl: Provisional adhoc school atanga sorkarin a hlan kai tawhte chuan kum hnih chuang zet upgradation notification nghaka an aupui tawh hnuah pawh awmze thui tak a neih loh avangin August 5 atangin nawrh an tum.
Provisional Adhoc School Association hotute chuan a hma pawhin pawl ang leh school mal angin chief minister, concern minister leh official hrang hrangte vawi tam tak an lo dawr tawh thin a. Sorkar atanga fel mai tura an sawi thinte chu tun thlenga a tak taka fel thei si lo chu hriatthiam har an tih thu an sawi.
Sorkarin an dinhmun a chin felsak lawk loh avang hian harsatna tam tak an tawh phah mek thu sawiin, school thenkhat zirtirtute phei chu hlawh pawh nei mumal lova an awm phah tawh thu an sawi bawk.
An dinhmun tifel turin August 4, 2026 thleng sorkar hmalakna an ngaichang dawn a, hemi chhunga an dinhmun tihfel a nih loh chuan August 5 atanga 7 chhungin No Teaching Day/Pen Down Strike neih an tum a. Sorkarin an dinhmun a tihfelsak zawm zel lo a nih chuan a tul angin hmalakna dang an neih chhunzawm zel tur thu an sawi.
An dinhmun tihfelsak thuai a, a pawimawh ber effective date hi April, 2026 atanga hman theih tura ruahmanna siamsak ngei turin sorkar an ngen nawn leh a ni.