Tourism Minister Lalnghinglova Hmar hova tourism department hotute thukhawm chuan Mizoram chu ‘Winter Capital of India’ ni thei tura hma lak dan leh homestay 189 sak tura hmalakna an thlir ho.

Zirtawpnia minister pisaa department hmalakna thlirleta thutkhawmah hian Mizoram chu ‘Winter Capital of India’ ni thei tura hma lak dan tur ngaihtuah a ni a, Winter Festival pawh sorkar department hrang hrangte nen tha thawh khawmin lian leh ngelnghet zawka hman rawt a ni.

Tourism minister chuan, “Mizoramah hian eng sector hi nge thang thei ber tih ngun takin thlir ta ila, tourism hi thang thei ber leh sum leh pai thawkchhuak thei ber turah ka ngai. Tourism department hi hun rei tak department lian ni lova ngaih a ni lo tawh a, hei hi vawi leh khatah tidanglam nghal vek thei dawn lo mah ila theihtawp kan chhuah zel ang. Hemi kawngah hian awareness leh publicity lamah multimedia campaign nen nasa zawka hma kan lak pawh a ngai,” a ti.

Thutkhawmah hian tourism department hnuaia hmasawnna ruhrel (infrastructure) project kalpui mek leh hmachhawpte chipchiar taka thlirho a ni a. Tun dinhmunah Rs vbc 660.63 man hu infrastructure project 17 kalpui mek a ni a. PM-JUGA leh Bana Kaih Scheme hnuaiah Mizoram hmun hrang hrangah homestay 189 sak a ni dawn a, heng homestay-te hi a sak phung leh rawng inang tlanga sak tum an ni a. Chaltlang Tourist Lodge hmunah 4-star hotel aia hniam lo sak tura hmalak a ni.

Swadesh Darshan hnuaia project thar thehluh tur leh tourism calendar thlirho a ni a, awmze nei zawka inzirtirna kalpui dan tur leh, department hnuaia thawktu awm mek leh mamawh belh dante sawiho a ni bawk.

January leh May inkarah khualzin nuai khat dawn

Kumin January atanga May thla chhung khan India hmun dang leh ram pawn atanga Mizorama lo zin khualzin mi 98,576 an awm.

Mizoramah khualzin an pung zel a, Sairang rel chawlhhmun hawn a nih hnu phei chu rel hmanga rawn lut hi a tam ber pawl an ni.

Tourism department chhinchhiah danin, Sairang rel chawlhhmun rawn thlenga Inner Line Permit (ILP) la mi 43,298 an awm a. Hei hi thla nga chhunga khualzin zawng zawng atanga chhutin zaa 43.92 an tling a, khualzin pung zelah rel connectivity-in nghawng lian tak a nei tih a ti lang chiang hle.

Assam leh Mizoram inrina paltlanga lirthei hmanga lut mi 43,016 an tling a, heihi thla nga chhunga Mizorama zin zawng zawng atanga chhutin za zela 43.63 a tling a, rel hmanga Mizoram lutte nen an inzat thuak a ni.

Lirthei hmanga lut zingah Bairabi Checkgate-ah mi 25,957, Vairengte-ah mi 16,010 leh Kanhmun Police Checkgate-ah mi 1,049 ten ILP hi an la a ni.

Thlawhna hmanga rawn lut, Lengpui Airport-a ILP la leh rawn zin mi 12,262 an awm a, hei hi khualzin zawng zawng atanga chhutin zaa 12.43 a ni bawk.

Rel chawlhhmun leh road network tharte avangin Mizoramah khualzin an pung chho zel dawn niin a lang.