Aizawl: BJP Aizawl District President Dr Zonuntluanga chuan petrol-a ethanol pawlh hi central sorkarin thil thui tak an ngaihtuah avangin leh India economy ngaihtuah chunga hma an lakna a nih thu a sawi.
BJP Mizoram State Office, Mipui Run, Upper Republic-ah nimin khan Karthar Inhlanna leh Political Session neih a ni a. He huna thusawitu Dr. Zonuntluanga chuan Mizorama Congress party din tirha harsatna leh hmuhsitna an lo paltlang tawh tih sawiin, sorkarna an lak tak hnuah mipuiin an hlauh ang thil a thlen tak loh avanga rilru an thlak ang bawk hian, tuna BJP beitute pawhin nakkin lawkah ‘Development Party’ tiin BJP hi an la pawm ngei dawn thu a sawi.
Opposition party-ten central-a sorkar lai leh BJP kaihhruai sorkar hmasawnna hnathawh thatzia mipuiin an hria ang tih an hlauh luat avanga thudik chanve hmanga BJP beihna hluar a nih thu a sawi.
Ethanol leh petrol pawlh chungchang sawiin Dr Zonuntluanga chuan, he hmalakna hi India ram economy leh nakkin zela ram thatna tura central sorkar ruahmanna thui tak a nih thu a sawi a. Strait of Hormuz leh khawvel huapa harsatna hrang hrang karah Prime Minister Narendra Modi kaihhruai sorkarin India ram a inkhaichhuahna leh hmasawnna a thlen mekte chu Mizoram mipui pawhin an chhawr ve zel theih nan inlungrual taka thawhho a pawimawh thu a sawi bawk.