Aizawl: Iran leh Middle East biala indona avanga khawvel pumah tuialhthei man a danglam nasat tak avangin, sorkar laipui chuan ram pawna petrol, diesel leh aviation turbine fuel (ATF) thawn chhuah atanga chhiah lak (export duty) chu nasa takin a tisang.
Thawhtannia sorkar laipui hriattirna chhuah tar lang danin, he chhiah tihsanna hi hman nghal a ni a, ram chhungah tuialhthei mamawh khawp a awm reng theih nan leh ram pawna thawnchhuah tihtlemna tura hmalakna a ni.
Ruahmanna thar ang hian petrol bikah export duty hi litre khat zelah Rs. 2.5 atangin Rs. 3.5-ah tihsan a ni.
Diesel thawnchhuaha chhiah chi hnih a lak thin chu chawlkar hnih liam ta a litre khata Rs. 15.5 ni thin atangin litre khat zelah Rs. 25.5-ah tihsan a ni.
Aviation Turbine Fuel-a chhiah lak thin pawh litre khat zelah Rs. 14.5 atangin Rs. 22-ah tihsan a ni bawk.
Sorkar laipui chuan hetianga ram pawna thawnchhuah tura chhiah tihsanna hi ram chhung tuialhthei awm sa humhalhna leh ram mipuiten harsatna tawk lova mamawh khawp tuialhthei an hmuh reng theihna tura ruahmanna pawimawh tak a nih thu a tar lang a ni.