Thawhlehni khan Bangalore Baptist Hospital-ah Mizoram State Health Care Society leh Bangalore Baptist Hospital chuan inremna thuthlung, Memorandum of Agreement (MoA) chu Mizoram Health & Family Welfare Minister Lalrinpuii hmaah an ziak.
He MoA-ah hian Mizoram State Healthcare Society aiawhin H&FW Commissioner & Secretary Lalzarmawii chuan a hming a ziak a, Bangalore Baptist Hospital aiawhin Director & CEO Dr. Spurgeon R. chuan a hming a ziak bawk.
Bangalore Baptist Hospital hi kohhran mal ta ni lovin Christian Medical College (CMC) Vellore unit a ni a. Bangalore-a Mizo hnathawk leh zirlai awmte bakah Kristiante pan nasat ber pawl a nih avangin he inremna hian MUHCS hnuaia inenkawl duhte tan tangkaina lian tak a neih beisei a ni.
MoA sign-na inkhawmah hian health minister bakah Under Secretary & PS to Minister H. Lalhruaitluanga leh Bangalore Mizo Association hruaitute an tel.
He inremna thar nen hian tun dinhmunah Mizoram pawnah private, trust, leh mission hospital hrang hrang 52-ten MUHCS hi an zawm ta a ni.