Aizawl: Mizoram Pradesh Youth Congress Committee (MPYCC) buatsaihin Congress Bhawan-ah Thalai room siam thar hawnna neih a ni. He hun hi MPCC Senior Vice President Lalnunmawia Chuaungo leh MPCC hruaituten an hmanpui.
MPYCC Vice President Lalsanglura Sailo kaihhruai inkhawmah hian Lalnunmawia Chuaungo chuan, “Mizoram hmalam hun hi tuna kan thalaiteah hian a innghat a, kan hnam, kan ram leh kan sakhua an kutah a awm a ni. Chuvang chuan Congress Party chuan uluk takin thalaite tan rahbi thar siam turin ruahmanna a siam tawh a ni,” a ti.
ZPM sorkar sawselin Lalnunmawia Chuaungo chuan, sorkar hnuaiah corruption a hluar em em a, siam that tumna a awm lo tih sorkar hotute chet danah a lang tih a sawi a. MNF hun laia Restricted Tender te leh tun ZPM sorkar hnuaia Blanket approval leh departmental work lem hmanga mipui rawkna a hluar chu pawi a tih thu a sawi a. Kawngpui chhia leh AMC inthlan dawna kawng siamte reilote chhunga a chhe leh nghal vek a, Zoram kaihruai turin Congress a thawhchhuah leh a ngai tawh a ni, a ti bawk.
Ram chhunga hnathawh tur a van em em chhan chu sorkarin thalaite a ngaihsak loh leh hmalak dan tur a hriat loh vang tih sawiin MPCC Sr. Vice President chuan, local produce/ram chhunga thil siam chhuah humhalh leh lei hram hram a pawimawh thu a sawi bawk.
Health scheme hman mek MUHCS chungchangah, private damdawi in-a Rs nuai 1.5 a zai theih te Delhi Max Hospital-ah Rs nuai 6.5 te a zai tir a nih thu leh hei hian mipui sum tam tak a tihral tih a sawi a. Chutih rualin, June thla khan India ram pumah Mizoram chu GST khawm chhuak tlem ber state a ni chu sorkar hlawhchhamna chiang tak niin a sawi.
He hunah hian Ngunlianchunga MLA (Vice President, MPCC) leh MPYCC hruaitu hlui hrang hrang — Zodintluanga (Vice President MPCC), Alberta Lalthlamuana (GS MPCC), Dr. Lalmalsawma Nghaka (Corporator), Ngurdingpuia Pachuau (President MPYCC), HP Lalchuailova (Vice President MPYCC), R. Lalhmingmawia (Vice President MPYCC) leh Lalnunzira (Treasurer MPYCC) ten thu an sawi bawk.