Aizawl: Lunglei district-a Mualthuam North hmeichhe tleirawl H. Ramdinpuii (15) D/o H.Lalawmpuia chu khawtlangin Thawhtanni zan atanga a bo thu puang a, Thawhlehni nileng leh zankhua a an zawn hnuah Nilaini chawhma dar 10:30 vel khan Mualthuam North M/S bul hnimbuk karah thiin hmuh a ni.

Thudawn danin, H Ramdinpuii hi a ruang an hmuh hian a nghawng hmun hnihah zaina hnuhma hmuh a ni a, a bul velah thisen far leh hnuhma dang hmuh a ni lo va, helai vel hi Thawhlehni lam khan an lo zawng tawh niin an sawi.

H Ramdinpuii hi Thawhtanni zana a chhuah hma hian mobile phone a khawih a, hemi hnu hian pawnah chhuakin tu emawin a ko chhuak niin a lang a, heta tang hian a chin hriat a ni ta lo tih thudawnnain a tar lang.

He thil thleng chungchangah hian rinhlelh tur an la nei rih lo niin an sawi a. Hmeichhe tleirawl vanduaina tawk ta phone ken hi a pa ta niin an inbiakna delete vek a ni.

H. Ramdinpuii hi Mualthuam North H/S-ah Class X zirlai niin, first term exam-ah pawh khan pangana a ni a, unau pali niin amah hi a upa ber a ni.

Chanchin buatsaih lai hian Lunglei Police-te chuan thil thlen dan an enfiah mek zel a ni.

MZP in en liam dawn lo

H. Ramdinpuii thihna thleng chungchangah hian MZP General Headquarters chuan thuchhuah siamin pawi an tih thu leh hriatthiam har an tih thu an tar lang.

MZP General Headquarters chuan ‘zirlai duhawm, mi dang pawi sawi lo leh hma hun êng tak nei, mi kut tuar ngei nia hriat a nunna an laksak hi lungchhiatthlak leh pawi’ an tih thu an sawi a. An zirlaipui laka hetiang thil thleng hi an en liam mai mai dawn lo tih an tar lang bawk.

Dan leh thupek kengkhawhtute chu he tualthahna chungchang hi uluk taka chhui zui a, pawikhawihtu hi zawng chhuak ngei tur leh a na thei ang bera hremna pe ngei turin an phut.

MZP GHQ chuan zirlai thi ta chhungkhat lainate an tawrhpui tak zet thu an tar lang tel bawk.