Aizawl: Mizoram sorkar chuan ‘Bana Kaih Scheme’ hnuaia loan late hnenah loan pung (interest) rulh letsak nan Nilaini khan loan pe chhuaktu bank-te hnenah Rs 96,21,210 a pe chhuak a. Hei hi progress partner-te loan pung sorkarin a rulhsak tum hnihna a ni.
Sorkar thuchhuahin a tar lan danin, mi taima, tum ruh, thiamna leh theihna neite’n eizawnna bul an tan theih nan leh an eizawnna an tihchangtlung lehzual theih nana tana hmalakna a ni a. Tuna loan pung rulh sakna tura sum pek chhuah hi October 2025 leh March 2026 inkara loan punna te a ni.
Bana Kaih Scheme kalpuina tura sorkarin bank a thawhpui State Bank of India (SBI), Mizoram Rural Bank (MRB), leh Mizoram Cooperative Apex Bank (MCAB)-ahte he sum hi pek chhuah a ni a. Hemi bakah hian Annual Credit Guarantee Fee tling cheng Rs 14,01,762 a pe chhuak nghal bawk.
Partner bank pathumte hian Progress Partner-te bank account-ah loan punna an lo rulh tawhte hi August thla chhung ngeia thun fel hman an beisei thu sorkar thuchhuah chuan a tar lang.