Assam-a tui lian dinhmun chu a zual thar leh a, kuminah hian thi 95 awm tawhin district 14-a mi nuai 1.6 chuangin an tuar tih sorkarin bulletin a tihchhuah thar berah tar lan a ni.
Assam State Disaster Management Authority chuan mi paruk thi an awm belh leh tih Nilaini khan a sawi a. Thawhlehni atang khan district pangaah tui lian vanga harsatna tawk nuai 1.22 chuang awm belh lehin district 14-a mi 1,60,600 chuang an buai phah mek ta tih an sawi.
ASDMA bulletin tihchhuah thar chuan Sivasagar leh Biswanath district-a mi pahnih ve ve tui tla an awm a, Golaghat leh Morigaon-a pakhat ve ve thi thar an awm bawk a. Heng mite nen hian kumina tui liana an state-a thi chu mi 95 an tling ta a ni.
Ni tin tui lian dinhmun tichhuaktute hian Biswanath, Charaideo, Darrang, Dhemaji, Golaghat, Jorhat, Kamrup Metropolitan, Karbi Anglong, Lakhimpur, Nagaon, Sivasagar, Sonitpur, Tinsukia leh Udalguri district-ah an tuar mek tih an sawi a. Sivasagar chu a tuar na ber district niin mi 57,000 chuangin an buai phah mek a, Golaghat-ah mi 34,000 leh Jorhat-ah mi 25,000-ten harsatna an tawk mek bawk.
Sorkarin district parukah relief camp leh relief distribution centre 105 siamin mi 44,523 an khawsa mek a. Ni khat liam ta chhungin thuneituten tui lian tuarte tan hian buhfai quintal 528.44, dal quintal 126.72, chi quintal 73.21 leh tel litre 2,519.64 an sem.
ASDMA chuan tui hian khaw 563 a chim mek a, thlai chinna hmun hectare 16,951.76 a chim bawk tih an sawi a. Tui lian hian district hrang hrangah tuikhuah, kawngpui, lei leh thil pawimawh dang tam tak a tichhia a. Dhansiri lui chu Numaligarh-ah hlauhawm chin chhinchhiahna chungah a la luang a. Ran vulh 35,025 chuang tui lian avang hian tibuaiin 8,529 chu tuiin a la nghe nghe.
Assam-a tui lian hi kar hmasa lam atanga zualin kar tir lamah khan hmun tam takah a kâm leh hman tawh a; mahse, ruah a sur tam thar leh avangin Nilaini tuk atang khan district eng emaw zatah harsatna a awm thar a, khua, thlai chin, ran vulh leh thil dang chhia leh chim a awm thar leh teuh a ni.