Kum nga chuang indona a awm hnu, tun hnaiah sipaiten an ram hloh tawhte an lak let leh mek lai leh an thenawm ramten inbe tura an nawr hle laiin Myanmar-a tual chhung buaina ching fel tura inbiakna a awm theih hnaih hmel.
Thuk zawka an dinhmun zirtute (analyst)-te chuan hnam bil silai keng pawl hrang hrang inzawmna, mipuiin an thlan sorkara tel thinte pawh an telna pawl chuan an tanhmun an thlak tih a lang tih an sawi.
Steering Council for the Emergence of a Federal Democratic Union (SCEF) chuan thla hmasaa Thai leh Philippine foreign minister-te nena an inbiak hnuah buaina chu politic hmanga chin fel an duh niin an insawi a. Ram pahnih minister-te hian Myanmar-a sipaite pawh a hran ve vein an kawm ve bawk.
Myanmar-a sipai hotu, tuna an president ni ta, Min Aung Hlaing-a chuan SCEF chu an biak atan a la pawm chiah lo va; mahse, tun kar hian ASEAN aiawha an thenawma indonain a tihbuai ram ching fel tura hma la nasa tak leh nawrtu langsar, Thailand a tlawh dawn a, hetah hian inbiakna tura ruahmanna pawh an sawi rin a ni.
“Tatmadaw (sipai sorkar) paih thlak tumna an sawi thin chu an kalsan ta niin a lang,” tiin International Institute for Strategic Studies-a research fellow Morgan Michaels-a chuan SCEF chungchang a sawi.
“Tatmadaw leh SCEF inkara politic-a inbiakna chu a la hla mai thei a. A hnai zawk chu inbiakna a awm theihna tura ‘indawrna’ kan hmu dawn a ni,” a ti.
SCEF-in a tum ber chu civil mite thuneihna neihtir leh Myanmar-a sipaite politic-a an inrawlh loh a ni tih an thupuangtu, Saw Nimrod-a chuan a sawi.
“Hei hi kan duh ber a ni a; mahse, tunah chuan politic-a tihfel dan tur sawia indawr tha kan ti a ni,” tiin Reuters a hrilh a. “Inbe turin kan inhawng a, politic hmanga inchin felna tur kawng kan hawng a ni,” a ti.
Awmze nei taka inbiakna a awm theih nan SCEF chuan sipaite hian civil mite an beih an tihtawp leh politic avanga an mi mante an chhuah a ngai tih a sawi bawk.
Sipaiten an buaipui Myanmar inthlana chak ta, sorkar thar ding chu sipai hotu thin, Min Aung Hlaing-a’n kaihruaiin hel pawlte chu July 31-a inbe turin a lo sawm tawh.
“Muanna hi kan duh, kan neih châk ber a ni,” tiin Min Aung Hlaing-a hian kar hmasa khan parliament-ah a sawi a. Hetih lai hian inthlan hmanga sorkara thuneihna a chan hnuah sipaiten civil mite an bei nasa zual hle tih thil thleng viltuten an saiw thung.
February, 2021-a sipaiten Nobel Peace Prize lo dawng tawh, Aung San Suu Kyi-i kaihhruai mipui sorkar an paih thlak atang khan Myanmar-ah hian mi 1,00,000 chuang thah an ni tawh a, mi maktaduai tel tlanchhiain an eibar dinhmun pawh a chhe hle.
Sipai eptu hnam bil pawl hrang hrang lakah sipaite hian ram tak tak an chan hnuah China leh an thawhpui dangten puiin tun hnaiah ram an la let leh nual tawh.
Sipaiten neih an duh, ramri hrul lak an tumnaah Myanmar-a Bago laili leh chhim lama Dawei vela beitute chuan sipai an tam lutuk avangin an insaseng tih an sawi.
“A hmaa tluchhia anga ngaih sipaite hi an tluchhe lo va, politic leh sipai thilah an dam khaw chhuak a ni,” tiin Myanmar analyst pakhat, Aung Ko Ko chuan a sawi.
Analyst pathumte chuan SCEF-a tel hel pawl thenkhat chu ram dangten Myanmar sorkar nena inbe turin an nawr niin an sawi.
Ningani khan Min Aung Hlaing-a hian ASEAN tangrual aiawha Naypyitaw-a sipai sorkar dawrtu ber, Thailand a thleng a, Zirtawpni nen a tlawh dawn a ni.