India-a rorel lai, BJP chuan an party office bearer tharte an puang a, an zingah hian hmeichhia 12 telin ram chhunga sakhaw lian zual zuitute an tel vek bawk.
Nitin Nabin-a chuan national president 12-na atana ruat a nih hnu thla sarih, Thawhtanni khan a team tharte hi a puang a ni.
Union minister hlui, Smriti Irani-i telin national general secretary pariat an awm dawn a. An hruaitu hlun, national general secretary hlui, Ram Madhav chu vice president zingah a tel bawk.
Tripura chief minister hlui, Biplab Kumar Deb-a pawh national general secretary atan ruat a ni bawk.
Union Minister Piyush Goyal-a chu kum 2010 leh 2014 inkara a lo chelh tawh, treasurer a ni leh dawn a, Anil Baluni-a chu media in charge a nih chhunzawm dawn bawk.
BJP hian national general secretary pariat an nei dawn a, heng zingah hian a tang lai zing atangin Vinod Tawde leh Sunil Bansal te chiah an tel zui.
Tawde-a leh Bansal-a te hi state hrang hrang inthlanah in-charge niin an chanvo an hneh viau a, kum thar tira Uttar Pradesh telin assembly inthlan hmabak mitthla chungin ruat nawn leh an ni.
Bansal-a hi West Bengal inthlana a thawhhlawk hle laiin Tawde-a hi Kerala inthlana an in charge a ni a, Bihar state incharge ni bawkin Nitish Kumar-a chief minister atanga chawla Samrat Choudhary-a kuta a hlan pawh ama buaipui a ni.
National general secretary zingah hian Basti MP, Assam state incharge leh chi tha, Harish Dwivedi; Rajasthan state president hlui, OBC hruaitu, Satish Poonia; Madhya Pradesh-a tribal hruaitu Gajendra Patel leh Sanjay Bhatia te pawh an tel.
National secretary thar 14 zingah Uttar Pradesh-a Bulandshahr (SC) atanga MP-a vawi thum thlan tawh, Bhola Singh leh Madhya Pradesh atanga Rajya Sabha MP, OBC hruaitu, Kavita Patidar te pawh an tel.
President Nabin-a kaihhruai BJP national team tharah hian hmeichhia 12 an tel dawn a, hnam tlem zawk hruaitu paruk an tel bawk.
OB thar zinga 10 chu hmeichhe hruaitu tawnhriat hlawh tak tak an ni a. Party chuan chanvo thar pekte chu kil hrang hrang mite aiawh thei tur an nih thu leh state leh union territory 23-a mite an ni tih an sawi.
“Inkhairual taka national president executive team siam hi ram zau leh hmelhmang inang lo, ram bial tin dap chhuaka chet lakna tihlanna a ni,” an ti.
Vice president zingah hmeichhia pathum, Rajasthan chief minister hlui, Vasundhara Raje Scindia-i, union minister hlui D Purandeshwari-i leh National Commission for Women chief thin Rekha Verma te an tel.
Roop Kumari Choudhary-i chu Mahila Morcha president atan ruat a ni.
BJP hruaitute chuan team tharah hian India-a sakhaw liana mite an tel vek tih an sawi a. Kristian pahnih leh Sikh, Muslim, Jain leh Parsi atangin pakhat theuh an tel tih an sawi.
West Bengal, Madhya Pradesh, Maharashtra leh hmarchhak atangin tribal an tel a, pahnih chu hmeichhia an ni nghe nghe a. Scheduled Caste (SC) aiawhin Uttar Pradesh, Tamil Nadu leh Madhya Pradesh-a mi pakhat theuh an tel bawk.