Aizawl: Information & Public Relations Director K.Vanlalsangi chuan Nilaini chawhma khan Mizo Photographers’ Society (MPS)-ten World Photography Day 2026 puala August 19-21, 2026 chhunga awh tur, Photography Exhibition an buatsaih chu Vana Pa Hall-ah a hawng.
I&PR Director chuan MPS chu sorkar hmalakna hrang hrang, a bikin Mizoram sorkar calendar leh hnam lam (Mizo cultural dance) leh thuam vawn thatna kawnga pawl tangkai tak an nih thu sawiin, an hmalaknate chu hnam ziarang humhimna atan a hlu hle a ni, a ti.
He hawnna hun hi Lalnuntluanga, Finance Secretary, MPS-in a kaihruai a, General Secretary Zothankhuma’n report pein, President H. Lalchhanhima’n member thar te a lawm lut bawk.
Hemi hnu hian MPS buatsaih ‘National Open Photography Competition’ lawmman semna neih a ni a, he inelna a lut thlalak 567 zingah pakhatna chu lawmman hi Zarzoliana (Mizoram) hnenah hlan a ni a, pahnihna hi Shibasish Saha (West Bengal) leh pathumna hi Litan Das (West Bengal) te hnenah hlan an ni.
Kum 2012-a din MPS hian kum 2013 atang khan World Photography Day hi an lo hmang tan tawh a, tunah hian member 92 an awm mek a ni.