Indian Coast Guard (ICG) chuan Inrinnia Bay of Bengal-a Panama bungraw phur lawng, MV Ocean Winner pilah a thawkte zawn leh chhanchhuah hna a thawk mek zel tih Pathianni khan a sawi.
Lawng hi Odisha-a Paradip vaukam atanga tuipui mek 230 vela hlaa pulin thawktu 24 an chuang.
Thawktu zinga 20 hi Chinese an ni a, Myanmarese pathum leh Bangladeshi pakhat an tel tih thuneituten an sawi.
ICG leh Indian Navy chuan thawk dunin chhanchhuah hna an thawk a, a bul hnaia sumdawng lawng dangte pawh dam chhuakte awmna zawn hna thawhpui tura hrilh an ni bawk tih news agency PTI-in a tar lang.
ICG thupuangtu, MT Aisopos hmangin Inrinni zan dar 08:00 vel khan thawktu pahnih, liferaft hrana chuangte chhanchhuah an ni tih an puang tawh.
Union Minister Sarbananda Sonowal-a chuan mi pahnih chhanchhuahte hi a tul angin damdawi thiamten an enkawl zui nghal tih a sawi a. “An nihna leh tuna an dinhmun pawh hriat fiah a ni tawh,” tiin a sawi niin PTI chuan a tar lang.
Maritime Rescue Coordination Centre (MRCC) chuan chetsualna thlenna laia sumdawng lawng lo awm, MT Aisopos hi chhanchhuah hna thawhnaa pui tura koh pen an ni tih a sawi a. Lawng bo ta awmna dap tur leh a tul anga liferaft pawh pe thei a ni.
ICG chuan Pathianni khan thawktu chin la hriat lohte hi zawn zel niin lawng pathum tirh chhuah an ni tih a sawi a. X-ah, “Zawn leh chhanchhuah hna thawh chhunzawm zel a ni a. Aug 22, 2026 khan MRCC atangin thawktu 24 chuanna, MV Ocean Winner-in puih a ngaih thu leh a pil thu dawn a ni a International Safety Net (ISN) hmangin MT Aisopos chu koh pen liin an liferaft hmangin dam chhuak pahnih lak chhuah an ni a. Lawng pathum nen mi dangte pawh zawn mek zel an ni,” tiin an tar lang.
ICG lawng pahnih, Varad leh Anmol te chu zawn hna thawk tura tirh chhuah niin Vijit erawh Sri Vijaya Puram atanga tirh a ni ve thung.
MV Ocean Winner hian Odisha atangin China panin thir a phur a. Paradip Port atangin Ningani zan dar 10.30 velah tonne 1,700-a rit phurin a chhuak a ni.
Khawmual an biakpawh hnuhnung berah Paradip atanga tuipui mek 200 vela hlaah an awm a, a hnu atangin biakpawh zui an ni tawh lo niin Paradip Port Authority chuan a sawi. A tirah chuan ‘lawng bo’ tia sawi a ni hman a, a hnuah chhiatna hi an tawng zui tih hriat a ni ta a ni.