Sipaiten thlawhna atanga Myanmar-a monastery an kahnaah mi 14 an thi niin sipai dotute leh tual chhunga chhanchhuah hna thawktuin a sawi.
Zirtawpni tuka beihnaa thite hi upa deuh an ni tlangpui a, puithiam (monk) eng emaw zatin hliam an tuar bawk niin chhanchhuah hna thawktu pakhat chuan BBC Burmese a hrilh a, vawi hnih kah niin a sawi bawk.
Sipaite hian zing dar 09:00 (India-a zing dar 08:00) velah ram laili, Sagaing state Myaung khua, Mandalay khawthlang lam km 70 vela hlaa monastery hi an kap niin news agency AFP chuan a tar lang.
Monastery-ah hian Buddhist Lent pualin civil mite pathian be turin an kalkhawm lai nia sawi a ni a. Myanmar-a sipaite erawh chuan engmah an la sawi lo.
Mipui rorelna duha hel pawla mi, Nway Oo Myaung-a chuan thite hi mipa 11 leh hmeichhia niin AFP a hrilh a. Thi zinga panga hi khaw khat an ni a, a dang pakuate erawh chu an thenawm hnai khuaa mite an ni hlawm niin a sawi.
“Upa zawkten meditation centre hi an pan a ni,” tiin Myaung-a chuan a sawi a, thite hi kum 50 leh 70 inkar niin as awi.
Mi dang pakhat, sipai sorkar dotu tho, dam chhuakte zawnnaa tel chuan, “Mi chhanchhuah tuma kan beih lai mekin thlawhna a lo thlawk leh a, a vawi hnih nan bomb a rawn thlak leh a ni,” a ti.
Myanmar hi kum 2021-a sipaiten Aung San Suu Kyi-i kaihhruai sorkar an paih thlak hnuah tual chhung indona hmun a ni mek a, an hotunu pawh sipaite hrenna hnuaiah a awm a. Sipaite hi vantlang hmunte beia puh an ni fo va, anmahni erawh chuan sorkar dotute an bei thin niin an insawi thung.