Aizawl: Tourism Minister Lalnghinglova Hmar chuan Zirtawpni tlai khan Berawtlang Tourist Complex-ah ‘Development of Beraw Tourist Resort Project’ hnuaia sak khualbuk (cottage) thar panga a hawng. He project hi Scheme for Special Assistance to States for Capital Investment (SASCI) hmanga Rs. nuai 606 senga puitlin a ni.
Berawtlang Tourist Complex Multipurpose Hall-a hawnna inkhawmah Minister chuan khualzinte thlenna tur hmun changtlung tak hawn a ni ta chu lawmawm a tih thu a sawi a. Mizoramah tourism sector chu sum hai luhna hnar pawimawh tak a nih chhoh mek thu sawiin, kum 2024-25 aiin kum 2025-26 chhung khan Mizoram tlawhtu khualzin nuai li chuangin an pun thu leh ram pawn atanga lo kal pawh mi 9,000 chuangin an pun thu a sawi.
Tourism minister chuan he sector hi mi tam tak tana eizawnna siamsak theitu a nih avangin sorkar, mipui leh khawtlang hruaitute tanrual a tul hle a ni a ti a. Ram hmasawnna leh a hlawkna tak tak hmutu tur chu Mizoram mipuite an nih avangin theihtawp chhuahpui zel turin kalkhawmte a chah bawk.
Khualbuk thar panga hawn takah hian mut pindan pahnih theuh a awm a, a bang atan hmun hrang hrang atanga lakkhawm lung tha bik hman niin, a chhung pawh khualzinte tana changtlung leh nuam thei ang ber tura chei mawi a ni.