Aizawl: Solid Waste Management (SWM) Rules 2026 chu dan anga kalpui turin Aizawl Municipal Corporation (AMC) chuan hma a la mek a. Supreme Court thupek bawhzuina angin kumin October thla chhung hian AMC area pum atanga zaa 30-ah in tin atanga bawlhhlawh khawn (door-to-door collection) hna tan hman tura ruahmanna puitling zawk siam a ni.
He hmalakna Phase I-ah hian Aizawl khawpui chhunga Ward 7 (Ward III, VI, VIII, IX, XIII, XVI leh XVIII)-ah te kalpui hmasak a ni ang a, tunah hian Corporator leh Ward Committee-ten a taka buaipui hna an kalpui chho mek bawk.
Door-to-door collection man chungchangah hian mipuite’n zaa 40 an tum ang a, a bak zaa 60 chu AMC-in a tum thung dawn a ni.
Aizawl khawpui chhungah hian ni tin bawlhhlawh ton 120 atanga 130 vel lakkhawm thin anga chhut a ni a. Bawlhhlawhte hi a hmaa chi hnih chauha thliar hran thin a nih laiin, SWM Rules thar hnuaiah hian chi li-ah thliar hran a ngai tawh dawn a ni.
AMC hotute chuan bawlhhlawh tihtlem kawngah leh thliar hran kawngah chhungkaw tinte tangrual turin an ngen a, Aizawl khawpui fai leh thianghlim zawk an neih theih nan sorkar thuchhuah leh inkaihhruainate theihtawpa thlawp tlat turin mipuite an chah.