Ramin hma sawn a, changkannain nitin min chenchilh tawh a, kan hnena awm ve lo tura kan ngaih tam tak kan kawl tawh a, khawvel changkan rualin kan changkang ve zel a, a tha lamah pawh a ngaih theih awm e.
Hetih lai hian kan thawkna dawt, nunna hnar ni bawk thing hring ding erawh kan kit tam tulh tulh a, kan khawpui ber Aizawlah phei chuan thingkung ding hmuh tur a tlem telh telh ta.
Hmasawnna hnathawh a awm dawnin a tuartu hmasatu chu kan leilung, a bik takin thingkung dingte hi an ni duh khawp mai a, kan kih chereu miau zel avangin kan khawvel, kan ram leilung pawh a lum chho telh telh a, boruak tha min petute hi ngaihtuah thar an ngai khawp ta mai.
Green Mizoram Day te kan ti a, thing hringte kan han phun ve bawk thin a, a enkawl zui lamah engmah kan ni leh lem hlei lo a, nung a, duah chho hluah ta hi a vang viau! A awmsa tichereu zawnga kan khawsak miau avangin a tuartu chu keimahni bawk kan ni lo thei lo a ni.
Kan khawpui hian nunna min petu thingkung dinna hmun hi a mamawh a, hmasawnna hnathawh pawh awm dawn se tichereu zawnga chet loh dan hi ngaihtuah zel ni mawlh teh se.