Mizoram sorkar buatsaihin Aijal Club-ah ‘Learning from the Past for a Resilient Future’ tih thupui hmangin Mizoram chief secretary (CS) lo ni tawhte nen inkawmhona leh workshop neih a ni a, Chief Minister Lalduhoma chu khuallian a niin he hun hi a hmanpui.
Inrinnia he hun buatsaihah hian CS lo ni tawh mi pali — M. Lalmanzuala, Vanhela Pachuau, Lalnunmawia Chuaungo leh Dr. Renu Sharma-te an tel a, CS damlai zinga tel thei lo mi pangate thuchah chhiar chhuah a ni bawk.
Chief minister leh CS Khilli Ram Meena te chuan CS lo ni tawhte tawnhriat leh finna chu tuna thawk mek officer-te tana fuihna leh hmasawnna hmanrua a nih tur thu an sawi.
Khuallian Lalduhoma chuan, CS lo ni tawhte chawimawina chauh ni lovin an tawnhriat leh finna hmanga officer naupang zawkte fuihna leh kaihhruaina tur atan he hun hi ruahman a nih thu a sawi a. Hun khirh tak tak an lo paltlang tawh chungin sorkar hnathawkte hna pui ber mipui rawngbawl hna a la danglam chuang lo tih sawiin, finna, rinawmna, mahni inthununna leh taimakna te nen ram leh mipui rawngbawl chhunzawm zel turin kalkhawmte a chah.
Lalduhoma chuan sorkar hmalakna hrang hrang — Handholding Scheme, Project Monitoring Committee, Resource Mobilisation Committee, E-Office, Grievance Redressal leh Digital Land Administration-te sawi langin, ram hmasawnna leh mipui khawsak dinhmun chawikang tura theihtawp chhuah zui zel turin a fuih bawk.
Meena pawhin CS lo ni tawhte rawngbawlna leh chona an lo hmachhawn tawhte chu officer-ten phurna thar nena hna an thawhchhuah nan a tangkai hle dawn tih a sawi.
Programme hi session hnihah then niin, session hnihnaah CS lo ni tawhten an thil tawn leh fuihna thute sawiin, zawhna leh chhanna hun hmang ho a ni a; Home Secretary Vanlalmawia leh Planning Secretary David Lalthantluanga-ten state inrelbawlna kalpui dan an sawifiah bawk.