Delhi-a Satya Niketan-ah in chhawng ruka sang chim avangin mi paruk vel an thi a, pahnihin hliam na tak an tuat a, a chim karah mi dang tang an awm pawh rin a ni.
Delhi sorkar chuan a chim chhan chhuina tur thupek a tichhuak nghal a, Pathianni chawhnua in chimah hian mi 11 an chhan chhuak bawk.
Prime Minister Narendra Modi-a chuan chhiatna thleng chu pawi a tih thu a sawi a. “A tuartu chhungte ka tawrhpui a, hliamte pawh dang taka dam leh turin ka tawngtaipui a. Thuneituten a hmunah thil tul an buaipui nghal a ni,” tiin a office chuan X-ah a tar lang.
Khum 75 awmna khualbuk atana hman in hi chawhnu dar 1:30 vela chim a ni tih an sawi a, a neitu hi Gurugram-a cheng a ni.
Satya Niketan hi Delhi University-a South campus bul lawka awm niin zirlaite an cheng nasa hle.
“Hriat danin a in hi kum 40-50 vel a ni tawh a, a chhawng hnuai ber bakah a chungah chhawng ruk a awm a, PG accommodation atan hman a ni a. A chhawng hnuai berah hian thawm that hna thawk mek a ni,” tiin police-in an sawi.
Thil thleng hmutute chuan a chim lai hian a chhungah zirlai 50 vel an awm niin an sawi a, Pathianni a nih avangin awm an tam niin a hmuna awm zirlai pakhat chuan a sawi a. Mi dang pakhat pawhin mipa awmna atana ruahman, ‘Hostel Daze’ tih a nih thu a sawi.
Delhi Chief Minister Rekha Gupta-i chuan in chim pawi a tih thu leh chhanchhuah hna rang taka thawh nghal a nih thu a sawi a. “A bul hnaia ina awmte pawh inven nan tihruah a ni a. A tangte lak chhuak tuma beih niin a tuartu chhungte pawh puih an ni,” a ti.
“A hmuna thlir hnu leh a thlen dan thlir hnuah chief minister hian magisterial inquiry ti turin thupek a chhuah a, a in neitu lakah FIR ziah luh a ni bawk,” a ti.