Election Commission of India ruahmana electoral roll ennawn beihpui thlakna, Special Intensive Revision (SIR) 2026 zawh fel a nih hnuah Mizoram puma final electoral roll chu Thawhtanni khan Mizoram Chief Electoral Officer (CEO) Garima Gupta-i’n tlangzarhin vote nei mi 8,35,869 awmin, heng zingah third gender voter pakhat a awm.
Aijal Club-ah Mizoram SIR 2026 Final Electoral Roll a tlangzarhnaah CEO Gupta-i chuan Mizoram pumah vote nei mi 8,35,869 an awm thu a sawi a. Heng voter zingah hian mipa 4,03,179 leh hmeichhia 4,32,689 awmin, Siaha district atangin third gender voter pakhat a tel bawk.
CEO sawi danin SIR 2026 tan hma khan Mizoramah voter 8,75,068 an awm a, elector-te hi Enumeration Form pek vek an ni a. SIR kalpui a nih chhung hian Enumeration Form 8,28,906 lak khawm niin form 46,162 chu dawn let a ni lo va. Heng zingah mitthi 21,295; awmna chin hriat loh 8,333; hmun danga pem 13,978; roll-a thun tawh 2,248 leh sakhuana leh chhan dang vanga roll-a chuang duh lo 309 an ni.
July 4, 2026-a draft roll tihchhuah tuma elector 8,28,906 awm atang khan claim leh objections (Form 6, 7 leh 8) hrang hrang chin fel a nih hnuin elector 39,243 (4.73%) dah belh a ni a, elector 32,280 (3.89%) paih a ni thung.
Draft roll atangin final roll-ah hian elector hi 6,963 (0.84%)-in an pung a; mahse, tuna final roll 8,35,869 atanga teh chuan elector kiamna hi 39,199 a ni thung.
Heng bakah hian Mizoram pumah service voter 4,103 (mipa 4,010 leh hmeichhia 93) an awm bawk.
Gupta-i chuan ERO thutluknaa lungawi lo tan final roll tihchhuah atanga ni 15 chhungin district magistrate hnenah appeal theih a nih thu a sawi a. Mipui, political party, NGO, media leh election-a thawktu hrang hrang – ERO, AERO leh BLO-te zawng zawng chungah SIR 2026 hlawhtling taka zawh a nih theih nana an inpekna leh thawhhona tha tak avangin lawmthu a sawi a. Voter-te pawh an hming finfiah a, online leh offline hmanga in-register thar emaw, siam tha emaw, paih dilna theh lut turin a ngen nghal a; zawt fiah duh tan Toll Free number 18003341950 ah biak pawh reng theih a nih thu a sawi.
- Mizoram CEO-in Aizawla final electoral roll tlangzarh zawh hian district hrang hrangah an district theuha final electoral roll chu District Election Officer-ten an tlangzarh zui ve nghal a ni.
- SIR thawh thumna chu Mizoram tiamin state 16 leh UT pahnihah May 30 atang khan kalpui tan a ni a. Enumeration Phase chu June 28-a zawh tura ruahman ni mah se Mizoram bikah chuan June 25 khan zawh fel a ni.
- Assembly biala elector tamna ber Tuichawng, Lawngtlai district-ah 37,236 an awm.
- Assembly biala elector tlemna ber West Tuipui, Lunglei district-ah elector 14,667 an awm.
- Elector pun tamna ber chu Aizawl North I niin draft roll-a elector 25,472 awm chu final roll-ah 26,866 an ni a, 1,394-a pungin draft roll aia a tamna hi 5.47% a ni.
- Elector paih tamna ber West Tuipui-ah draft roll-ah elector 16,477 awmin final-ah 14,677 an awm a, 1,800-in a kiam a. Draft roll atangin 10.9% paih an ni.
- Aizawl North III chu sex ratio sanna ber niin mipa 1,000-ah hmeichhia 1,221 an awm a, Lunglei district-a West Tuipui chu a hniamna ber niin mipa 1,000-ah hmeichhia 848 an awm.