Aizawl: Chief Minister Lalduhoma chuan sorkar hnathawkte ‘Capacity Building’ chu ngaih pawimawh tial tial an tum thu leh Mizoram chu ‘Digital State’-a siam a tum tlat thu a sawi.
Thawhtanni khan chief minister hian Administrative Training Institute (ATI), Aizawl-ah ATI office application thar Smart ATI App, Smart Classroom leh Digital Learning Laboratory (DLL) te a hawng a. Thu sawiin, khawvel inher zelah digital hmasawnna hmanga awlsamna rawn thleng mek chu sorkar lam pawhin hman uar tial tial a tul thu sawiin, Mizoramin mipuite ziak leh chhiar thiam an tam avangin mission emaw, scheme hranpa awm rih lo mah se ‘Digital State’ ni thei an nih thu a sawi.
Chief minister chuan ICT Department kaltlangin sorkar portal 36 zet siam leh hmang mekte an nih thu sawiin, e-office kalpuina pawh office zawng zawngah hman a nih chuan sorkar hnathawh a fel duak dawn thu a sawi a. Sorkar hnathawkte thiamna leh capabilities tahhriam chu ATI mawhphurhna a nih avangin technology thar ber ber hmanga ATI thuam chhoh zel tum a nih thu a sawi bawk.
He hunah hian CM Adviser TBC Lalvenchhunga leh Commissioner & Secretary Vanlaldina Fanai te pawhin thu an sawi a ni.
Inkhawma tar lan a nih danin, Smart ATI App hian training programme hrang hrang registration, course material, certificate, attendance leh training history te digital-a enkawl vekna platform a pui dawn a ni. Mission Karmayogi kalphung angin DoPT atanga Rs. nuai 67.19 hmanga din Digital Learning Laboratory (DLL) atang hian ATI faculty-ten Mizo tawnga training course paruk an record tawhte chu DoPT-in pawmpuiin iGOT Karmayogi portal-ah onboard fel a ni tawh bawk.