Aizawl: Commerce & Industries Minister F. Rodingliana chuan Thawhlehni zingkar khan Aizawl New Market Building sak mek chu tlawhin Dawrpuia Zion street atanga New Market luhna kawng thlaa tuihawk luang nasa lutuk tihziaawm dan tur enin ruahmanna a siampui.
Aizawl New Market building a tlawhnaah hian minister hian ram leh mipuite tana pawimawh tak a nih avangin hna thawktute chu uluk leh chak taka hna thawk turin a chah a ni.
Zion Street atanga tuihawk luang lut hian harsatna a thlen loh nan step-ah te tui luhna tura awng mumal tak siama step sir drain-a a luang lut turin ruahmanna an siam bawk.
Hemi hnu hian minister hian ACC Building (Smart City ten an sak) leh ACC Annexe Building (C&I Department ten an sak) te a tlawh nghal a. New Market-a sorkar building-te chawm tura 500 kVA transformer dah te, electricity smart meter dah dan tur te leh ACC bakah ACC Annexe building inkalpawhna tur leh emergency exit tura steel bridge siam mek te pawh an enfiah nghal bawk.
Minister hi Commerce, Industries, Geology & Mining secretary leh a thawhpui te, E-in-C (PWD) te, UD&PA Director te bakah Dawrpui Local Council hruaituten an tawiawm a ni.