National Health Mission (NHM), Mizoram leh Johns Hopkins University hnuaia organization pakhat, Jhpiego ten Mizoram chhunga hriselna hna thawh leh health system tihchakna turin Thawhlehni khan Health Minister Lalrinpuii pisa-ah thawhhona thuthlung (MoA) an ziak.
Inremna hi NHM Mission Director Dr. R. Lalchhuanawma leh Jhpiego India Country Director Dr. Amit Shah ten minister hriatpuinain H&FW Department official te hmaah hming an ziak.
He hun hi Lalnunmawii, Additional Secretary, H&FW Department in kaihhruaiin, Jhpiego Country Director Dr. Shah chuan he thawhhona hian Mizoram mipuite tan rah tha tak a chhuah ngei a beisei thu a sawi a. NHM Mission Director Dr. R. Lalchhuanawma pawhin Jhpiego nena an lo thawhdun tawhna ah Comprehensive Health Care-ah hmasawnna hmuh tur a awm tawh thu leh he MoA thar hian mipui rawngbawlna hmasawnna nasat zawk a thlen ngei a beisei thu a sawi bawk.
Health minister chuan thawhhona hian Mizoram sorkar leh mipuite hriselna atangin nghawng tha tak a neih ngei a beisei thu a sawi a ni.
MoA hnuaiah hian Comprehensive Primary Health Care, Nutrition, Reproductive, Maternal, Newborn, Child & Adolescent Health (RMNCAH+A), bakah Communicable leh Non-Communicable Diseases vawnhim leh enkawlna kawngah te thawhhona changtlung tak an nei tawh dawn a ni.