My Bharat Portal hmanga thalaite au chhuak turin National Service Scheme (NSS) leh My Bharat-in an ngen a. Viksit Bharat Young Leaders Dialogue (VBYLD) 2027 an tlangzarh nghal.
NSS leh My Bharat te chuan Ningani khan Aizawl Press Club-a thu thar theh darhtute an kawmnaah, thalaite chu My Bharat Portal hmangin ram siamna kawnga an hmachhawp leh ngaihtuahna tha tak an neihte au chhuahpui turin an ngen.
NSS hotute sawi danin VBYLD 2027 thil tum ber chu hnam inpumkhatna leh inunauna tihhmasawn a ni a. Ram pum huap leh khawtlang hrang hrang atanga thalaite hmun khata hruai khawmin, inbiakpawhna tha siamsak leh hnam leh culture hrang hrang inhriatthiam tawn tir hmanga hnam inpumkhatna tihchak an tum a ni.
NSS Nodal Officer Prof. Lalrinmawia chuan, Ministry of Youth Affairs & Sports duan ‘VBYLD 2027’ chu tlangzarh a nih thu leh, Viksit Bharat Quiz hi ram pum huap thalai te tana hmalakna hmasa ber a nih thu a sawi.
VBYLD 2026-ah ram pum atangin thalai nuai 50 chuangin MYBharat leh MYGov platform hmangin Viksit Bharat Quiz hi an chhang a. Merit-based leh multi-stage selection process kaltlanga thlan chhuah thalai 3,000 vel te chuan he VBYLD-ah hian telna hun tha an lo nei tawh a ni.