- Laiu Fachhai
Kan hriat theuh angin, India hian hnam hla pahnih a nei a, Jana Gana Mana leh Vande Mataram. A Sap tawg chuan, Jana Gana Mana hi National Anthem a ni a, Vande Mataram erawh National Song a ni thung. Mizo tawngah erawh chuan National Anthem leh National Song te hi thliar hrang chuang lovin, a pahnih hian “Hnam Hla” tih an ni ve ve mai awm e. National Anthem, Jana Gana Mana hi Rabindranath Tagore-an December 11, 1911-ah a phuah a. National Song, Vande Mataram hi Bankim Chandra Chatterjee-an November 7, 1875-ah a phuah thung. Chuvangin, Vande Mataram hi Jana Gana Mana aiin a upa zawk.
India-in zalenna a hmuh hnuah, Constituent Assembly chuan January 24, 1950-ah Jana Gana Mana chu National Anthem atan a pawm a. Chumi ni vekah chuan Vande Mataram pawh National Song atan pawm tel a ni. Chutichuan, he hnam hla pahnihte hi a hman dan tur, a hman hun leh hmun te pawh chiang taka duan a ni a. Chu lam chu tlang hriat a nih avangin, he article-ah hian sawi nawn kher ngai loah dah ila. National Anthem, Jana Gana Mana zahna lantîr tu chu constitution thupek a ni. National Song, Vande Mataram pawh zah hle tur a ni. Chutih rual chuan, a tirah chuan National Song hi National Anthem ang em chuan constitutional thupek leh mawhphurhna a keng tel ve lo.
National Song, Vande Mataram-ah hian chang khatna leh chang hnihnaah te chuan India chu nu (mother/motherland) anga sawi leh phuah a ni a, chang thumna atangin India chu Hindu hmeichhe pathiante nena tehkhin ani a. Chuvangin, sakhua hrang hrangte awmhona India ram dinhmun atanga thlirin, neutral zawk ni tura ngaih chang khatna leh chang hnihna thleng chauh sa turin Indian National Congress chuan kum 1937-ah a pawm a, Constituent Assembly pawhin chang khatna leh chang hnihna chauh sak turin kum 1950-ah a pawm ta a ni. Chutiang chuan kum tam tak a kal a, chang thumna atanga chang rukna thleng chu, a hun leh a hmun a zirin, program buatsaihtute duhdan in sak tel chang te pawh a awm thin awm e.
Chutianga buaina awm lova a kal lai chuan, Central-a kan sawrkar hrawn mek hian Vande Mataram chu official functions, school programs leh ceremonial events-ah te, a chang zawng zawng, chang ruk thleng sa vek turin kumin (2026) February thla khan order a chhuah tlat mai a. National Anthem, Jana Gana Mana sak hmain National Song, Vande Mataram chu a zavaia music-in play vek tura tih a ni bawk. He thil hian sawizui a hlawh hle. Tha ti lo tute leh pawm thei lotu tam tak an awm a, innghirnghona pawh a tichhuak hial a ni.
India Constitution Preamble-ah India chu “socialist, secular, democratic republic” ram a ni tih a inziak a. Chuvangin, secular ram National Song-ah sakhua pakhat chauh tih bik pathian hming telh chu thil dik leh tha ber a ni lo ang, tih hi mi thiam thenkhat, political party thenkhat leh sakhua dang mite dinna a ni. National Song sak apiangin Hindu sakhua hmeichhe pathiante – Durga, Lakshmi leh Saraswati – te chu sakhua dang mite pawhin chibai an buk thin a ngai dawn a, chu chuan India chu socialist, secular, democratic republic a nihna constitution-in a pawm leh a humhalh chu a bawhchhe dawn, tia ngaihdan leh pawm dan neitute an awm a ni.
Chutih rual chuan, National Anthem leh National Song chungchanga hriat tur pawimawh pakhat chu hei hi a ni: Sakhuana leh hnam hla hi inzawmna thuk tak an nei a; hnam hla chuan a rama majority sakhua chu eng sakhua nge a ni tih pawh a tilang thin. Minority sakhua member’ten an duh emaw, an duh loh emaw, National Anthem leh National Song te hi chu majority sakhua zuitute duh dan leh kalphung angin a kal tlangpui. Hei hi thil tha ber a nih leh nih loh lam chu thu hran ni sela, constitution secular nature a bawhchhiat leh bawhchhiat loh lam pawh inhnial theihna awm mah se, minority-te chuan majority-ten hnam hla atana an thlan chu an pawmpui ve mai a. Chutichuan, National Anthem leh National Song an sak hunah te, majority-te pathian hming chu minority-te pawhin an lam ve mai thin. National Anthem leh National Song chungchangah pawh hian “tyranny of the majority” (a tam zawkte nunrawnna) a lanna a awm ve thin hi maw.
A hnuaia ziah tlar ramte hian an National Anthem-ah an sakhua pathian chibai bukna an telh; an pathian an hriat dan leh an rin dan erawh chu a inang vek lo: Antigua & Barbuda, Barbados, Botswana, Brunei, Colombia, Cyprus, Dominica, Ecuador, Estonia, Eswatini, Fiji, Gambia, Georgia, Ghana, Grenada, Hungary, Iceland, Jamaica, Kenya, Kiribati, Latvia, Lesotho, Liberia, Liechtenstein, Luxembourg, Madagascar, Malawi, Malta, Marshall Islands, Mauritius, Mexico, Netherlands, New Zealand, Nigeria, Norway, Palau, Papua New Guinea, Peru, Romania, Russia, Rwanda, Saint Kitts and Nevis, Saint Lucia, Saint Vincent and the Grenadines, Samoa, Serbia, Seychelles, Slovenia, Solomon Islands, South Africa, South Korea, South Sudan, Suriname, Switzerland, Tanzania, Togo, Tonga, Trinidad and Tobago, Tuvalu, Uganda, United Kingdom, United States of America (chang 4-na leh chang tawpna), Vanuatu, Venezuela leh Zimbabwe. Samoa ram hnam hla-ah phei chuan Isua hming a tel.
Kristiante hi, Mizoram Kristiante tiamin kan double standard reuhna a awm thin. Pu Rokunga (1914–1969) hla phuah, “Ro Min Rel Sak Ang Che” tih chu Mizoram State Hla (Anthem) atan hmanni lawkah khan Mizoram Assembly-in a pawm a. Chang khatna, tlar khatnaah “Aw nang, kan Lal kan Pathian” tiin Kristiante lal leh pathian chibai buknain a tan a. A chang zawng zawng pawh Kristiante pathian lam hawi vek a ni. Mizoramah chuan Kristiante majority kan nihna chhawr tangkaiin, Kristiante pathian lam hawi-a phuah State Hla hi Mizorama sakhua dang mite pawhin pawm vein sa ve tura beisei an ni. An ngaihdan pawh lak a ni lo. Minority-te chu majority-ten an phuah leh an pawm hnam hla chu an pawm ve mai turah beisei an ni. Party thenkhatte motto, “Pathian leh kan ram tan” tih leh “Ram rorelna-a Pathian ram tun din” tih te pawh hi secular rama state pakhat motto atan chuan a secular lo hle nia ngaite pawh an awm ang.
Ni e, Hindu-te majority-na India ram ah kan awm si a, chuvangin, majority-te rinnaah innghat Indian National Song, Vande Mataram hi kan sak changin Kristiante pathian ni lo Hindu pathian hming kan lo lam a nih pawhin, zirlaite leh puitlingte tan Kristianna kalsan tir theihna khawpa thil hlauhawm a ni lo. Daniela leh a thiante khan pathian nung, Jehova betute an nih avangin, Lal Nebukadnezzara lim chu pathian chibai buk anga buk tura thupek an zawm duh loh ang khan, Vande Mataram hla thu hmanga Hindu pathiante chibai buk chu Kristiante tan a tih chi lo ang, tia ngaihdan neitute awm ve bawk mah se, a hun, a hmun, a tum leh nihna dinhmun te avanga sak loh theih loh chang pawh a awm thin ngei ang. Chuvângin, pawm thiamna tawk chen nei ve a tha hle.
A tawpah chuan, India hian National Anthem ropui tak, Jana Gana Mana kan nei tho a, chuvangin Central-a kan sawrkar hrawn mekin National Song, Vande Mataram a zavaia sak vek tura thupek a chhuah hi chu tul bera nia ngai lohtute an awm hi a dikna chen a awm ani. Chuvangin, Hindu sakhua zuitu ni lo khua leh tui te rilru leh thinlung te a tihliam thei tih hriain, chang 3-na atanga chang 6-na thleng sak tur leh sak loh tur chu program buatsaihtute duhthlanna-ah nghat zawk ni se, a lawmawm ngawt ang.
A enga pawh chu lo ni se, Mizorama sakhua dang mite’n Kristiante pathian hming lamna Mizoram State Hnam Hla min sakpui thin ang hian, keini pawh double standard neih tum lovin, India National Song, Vande Mataram hi, a chang zawng zawng sakna hmun leh hunah chuan, hreh hle mah ila, kan compatriot-te nen i sa ho dial dial ang u. Kristiante rinna chu chhungkua leh kohhranah tha tak leh taima taka kan inzirtir a, kan rinna a nghet phawt chuan kan tha mai ang. Hlauhna tur a awm lo.
LALPA in Pathian chu in thinlung zawng zawngin, in rilru zawng zawngin, in chakna zawng zawngin in hmangaih tûr a ni. Tin, hêng thu, vawiina ka pêk che u hi in thinlungah a châm reng ang a; in fate thahnemngai takin in zirtîr ang a, in ina in thut lai te, kawnga in kal lai te, in mut lai te, in thawh hun tein in sawi thîn tûr a ni.
Deuteronomy 6.5-7
Invêng ula, rinnaah chuan ding nghet ula, intihuai ula, chak takin awm rawh u.
1 Korinth 16.13