Aizawl: Mizoram chhunga iron rod la luttute leh zuartute chu a size dik tak leh buk tling ngei zuar turin Food, Civil Supplies & Consumer Affairs (FCS&CA) hnuaia Controller of Legal Metrology chuan a hriattirna a chhuah.
Legal Metrology thuchhuah tar lan danin, tunlaiin Mizoram chhunga iron rod lakluh leh zawrh mekte zingah a standard size aia te a tam tih hriat a ni. Hetiang rod standard tling lo hman hian sorkar leh mi mal insaknaah dinhmun hlawhawm leh nghawng tha lo tak a thlen theih avangin, mipuiin rod standard dik tak an lei theih nan iron rod zuartute chu an thil zawrh te a buk chauhva zuar tur leh standard size dik lo la lut lo turin ngen an ni.
Iron rod zuartute hian an thil zawrh bukna atan Electronic Weighing Machine an kawl vek tur a ni a, heng an buknate hi Legal Metrology Department-in an endik leh certificate an pek ngei a ni tur a ni bawk.
Mipui (customer)-te pawhin an thil lei tur bukna hi an duh chuan an endik phalsak an ni dawn a, iron rod zuartute hian a buk tling chauh an hralhchhuak tur a ni.
Dan bawhchhiate chu an bungrua mansak theih an nih piah lamah pawisa chawitirin hremna a vawi khatnaah Rs 5,000, a vawi hnihnaah Rs 1,00,000 leh a vawi thumna atanga an tihsual apaungin Rs 2,00,000 thleng chawitir an ni dawn a ni.
Iron rod zuartute hian insiamthatna atan October 2026 thleng hun pek an ni a, hemi thla hnu lamah dan bawhchhiate chu na taka hrem an ni tawh dawn a ni.