Kolasib district-a four lane kawngpui laih avanga Sethawn RTP Farm bula electric ban sawntu mi paruk chu Inrinni chhun dar 12 pelh khan electric-in mi paruk manin, mi pathum an thi a. Thite hi Mizoram mi pakhat, Manipur leh Myanmar mi pakhat ve ve an ni.
Kawngpui sira electric ban, LT Line awmte hi NHIDCL hnuaia sub-contractor-in an sawn mek a, Inrinnia hnathawktu paruk chu line an zawn sawnna lamah 11 KV line an tawh palh avangin electric hian a man ta nia hriat a ni.
Mi parukte hi Kolasib District Hospital panpui nghal ni mah se, an zinga mi pathum — Lalrinawma, kum 18, Mamit district-a Vawngawnzo khaw mi; Lalruatfela, kum 20, Thingpuikul, Manipur leh Thianhumhim, kum 16, Myanmar-a Haikhawl khaw mi nia hriatte chuan chhan theih an ni lo va, mi dang pathumte erawh hun eng emaw chen nikhawhrelova an awm hnuah an harh chhuak a, dinhmun ngaihtuahawm lutuk an ni lo a ni.
Electric man avanga thi mi pathumte ruang hi Koalsib District Hospital-ah posmortem nghalin, Kolasib Sub-Hqrs. YMA-in kuang an siamsak a ni.